ՄԻՊ-ը առանձնազրույցներէ ունեցել քաղաքացիական ակցիաների ժամանակ բերման ենթարկված և ձերբակալված անձանց հետ

Այս պահին տեղի են ունենում Մարդու իրավունքների պաշտպան Արման Թաթոյանի առանձնազրույցները նոյեմբերի 20-ին տեղի ունեցած քաղաքացիական ակցիաների ժամանակ բերման ենթարկված և ձերբակալված անձանց հետ Ոստիկանության Երևան քաղաքի վարչության Ձերբակալվածների պահման վայրում։ Այս մասին հայտնում են ՀՀ ՄԻՊ-ի գրասենյակից:

Ավելի վաղ «Իրավական ուղի» ՀԿ-ի ղեկավար, իրավապաշտպան Ռուբեն Մելիքյանը ֆեյսբուքյան իր էջում գրառում էր կատարել՝ անդրադառնալով այսօր վարչապետ Նիկոլ Փաշինյանի հրաժարականը պահանջող խաղաղ անհնազանդության ակցիայի ժամանակ տեղի ունեցած ձերբակալություններին։

«Շուրջ 20 հանրային գործիչ 72 ժամով ձերբակալվել է՝ գերագույն գլխավոր դավաճանի հեռացման պահանջով «հանրահավաք կազմակերպելու և անցկացնելու» համար։ Շուրջ 200-ը բերման է ենթարկվել ու ժամեր անց ազատ է արձակվել։

Արժանապատվության ճգնաժամը շարունակվում է»,- գրել էր Մելիքյանը։