1 օրում Հայաստան է ժամանել ռուս խաղաղապահներին տեղափոխող 22 ինքնաթիռ. ՌԴ ՊՆ

 Իլ-76 և Ան-124 ինքնաթիռները ռուս խաղաղապահներին Լեռնային Ղարաբաղ տեղափոխելու համար 1 օրում 22 թռիչք են իրականացրել դեպի Հայաստան: Այս մասին հայտնում է  «ՌԻԱ Նովոստի» գործակալությունը, հղում անելով ՌԴ ՊՆ-ին։ Օդային տարածքից շարասյան անվտանգությունն ապահովում են ուղեկցող Մի-8 և Մի-24 ուղղաթիռները։ 

«1 օրում «Ուլյանովսկ-Վոստոչնի» օդանավակայանից Ռուսաստանի օդատիեզերական ուժերի ռազմական տրանսպորտային ավիացիայի Իլ-76 և Ան-124 ինքնաթիռները 22 թռիչք են իրականացրել։ Հայաստան է տեղափոխվել 64 միավոր ավտոմոբիլային ու հատուկ տեխնիկա՝ զրահամեքենաներ, բեռնատարներ, ավտոցիստեռններ, էքսկավատորներ և նյութատեխնիկական աջակցության այլ սարքավորումներ», - նշվում է ՌԴ ՊՆ-ի հաղորդագրությունում: 

Նշենք, որ նոյեմբերի 11-ին Հայաստանի, Ռուսաստանի, Ադրբեջանի միջև կնքվել էր եռակողմ պայմանագիր, որի շրջանակում Ղարաբաղում ռուս խաղաղապահներ տեղակայելու շուրջ պայմանավորվածություն է ձեռք բերվել: