Հակառակորդը կիրառում է իր ողջ զինանոցը, մեր մարտիկները հետ են մղում հակառակորդի գրոհները. ՊԲ փոխնգապետ
Ընթանում են ինտենսիվ մարտեր։ Հակառակորդին պատճառված են կենդանի ուժի և տեխնիկայի կորուստներ։ Թշնամին թիրախավորում է նաև թիկունքի բնակավայրերը, այդ թվում՝ Ստեփանակերտը։ Այս մասին այսօր կայացած մամուլի ասուլիսի ժամանակ ասել է ԱՀ ՊԲ մամուլի պատասխանատուի ժ/պ, փոխգնդապետ Սուրեն Սարումյանը:
«Այս պահին մարտական գործողություններ են ընթանում ռազմաճակատի ամբողջ երկայնքով։ Մարտական գործողությունները հատկապես ինտենսիվ են հյուսիսային եւ հարավային ուղղություններով։ Հակառակորդը կիրառում է իր ողջ զինանոցը՝ ԱԹՍ-ներ, ավիացիա, զրահատանկային եւ հատուկ նշանակության ստորաբաժանումներ, հրետանի։ ՊԲ մարտիկները, ցուցաբերելով հերոսության իսկապես անօրինակ դրսեւորումներ, հետ են մղում հակառակորդի գրոհները՝ ամուր կանգնած իրենց բնագծերում»,- ասել է Սարումյանը։
Նա նշել է, որ հակառակորդը շարունակում է խախտել պատերազմի բոլոր գրված և չգրված օրենքները: Միևնույն ժամանակ նշել է նաև, որ ՊԲ մարտիկներն ամուր կանգնած են հայրենիքի պաշտպանության դիրքերում։
