Խոշոր վթար երթուղայինի մասնակցությամբ. մանրամասներ տուժած քաղաքացիների առողջական վիճակից

Քիչ առաջ հայտնել էինք, որ այսօր ժամը 18։11-ին ԱԻՆ մարզային ճգնաժամային կառավարման կենտրոն ահազանգ է ստացվել, որ Ծովագյուղ գյուղի խաչմերուկում տեղի է ունեցել ՃՏՊ․ կան տուժածներ։ Այս մասին հայտնում են ԱԻՆ-ի լրատվության ծառայությունից։

Դեպքի վայր է մեկնել ԱԻՆ ՓԾ Գեղարքունիքի մարզային փրկարարական վարչության օպերատիվ խումբը եւ հրշեջ-փրկարարական ջոկատից մեկ մարտական հաշվարկ։

Պարզվել է, որ Մ-4 ավտոճանապարհի Սեւան-Դիլիջան հատվածի 18-րդ կմ-ին բախվել են «Ford» մակնիշի եւ Իջեւան-Երեւան երթուղին սպասարկող «ԳԱԶել» մակնիշի ավտոմեքենաները․ կա 12 տուժած։

Փրկարարների եւ քաղաքացիների համատեղ ուժերով 11 տուժած տեղափոխվել են Սեւանի ԲԿ, մեկ տուժած՝ Դիլիջանի ԲԿ։

Auroranews- ի հետ զրույցում Առողջապահության նախարարության մամուլի խոսնակ Ալինա Նիկողոսյանը նշեց, որ տուժած քաղաքացիների վիճակը կայուն է: «Գտնվում են հետազոտությունների փուլում»,- նշեց մեր զրուցակիցը: