Լարված իրավիճակ Մինսկում. ցուցարարները մոտեցել են Բելառուսի նախագահ Ալեքսանդր Լուկաշենկոյի նստավայրին
Մինսկում բազմահազարանոց ցույցի մասնակիցները մոտեցել են Անկախության պալատին՝ Բելառուսի նախագահ Ալեքսանդր Լուկաշենկոյի նստավայրին։ Այդ մասին գրում է ТАСС-ը։
Միևնույն ժամանակ, Հաղթողների պողոտան, որ տանում է դեպի նստավայր, շրջափակել են վահաններով հատուկջոկատայինները։ Ճանապարհին նաև ջրցաններ ու 3 մետրանոց մետաղական պատնեշներ են։ Ցուցարարները գոչում են՝ ՙԴուրս արի՚, ՙՈրքան արժե խիղճդ՚։
РИА Новости-ն հայտնում է, որ նստավայրի մոտ է գտնվում Բելառուսի Գերագույն դատարանի շենքը: Հարևանությամբ կայանվել է փշալարարեվ մեքենան:
Տեղի լրատվամիջոցները նշում են, որ ուժային կառույցների ներկայացուցիչներն արդեն տասնյակ քաղաքացիների են ձերբակալել:
ТАСС գործակալության փոխանցմամբ՝ չարտոնագրված բողոքի ցույցեր այսօր տեղի են ունենում Բելառուսի բոլոր մարզերում, մասնակիցների թիվը, ըստ ականատեսների 100 000 անցնում է:
Հիշեցնենք, որ ընդդիմադիրներն ու նրանց կողմնակիցներն ամեն օր բողոքի ցույցեր են իրականացնում օգոստոսի 9-ին կայացած նախագահական ընտրություններից հետո՝ բողոքելով արդյունքների դեմ, որոնց համաձայն հաղթող է ճանաչվել երկրի գործող նախագահը:
