Քիչ առաջ   «Լիդիան Արմենիան» ընկերությունը  հանդես է եկել  հայտարարությամբ, որում անդրադարձել է  Ամուլսարի պահնորդների և տեղի հերթապահ քաղաքացիների միջև տեղի ունեցած ծեծկռտուքին, ինչպես նաև  «Լուսավոր Հայաստան» խմբակցության պատգամավորների երեկ Ամուլսարում գտնվելու հանգամանքին:

Ընկերությունը իր հայտարարությունում նշել է, որ ծեծկռտուքի նախորդ օրը  ԼՀԿ պատգամավորները այցելել են Ամուլսարի տարածք և զրուցել քաղաքացիների հետ և հրապարակել այդ ամենը ապացուցող տեսակադրեր: 

«Լիդիան Արմենիայի» հայտարարությունում մասնավորապես ասվում է.

«Հայտնի չէ, թե ինչ են խոստացել ապօրինություն իրականացնող խմբավորման անդամներին ԱԺ պատգամավորները, բայց հենց նույն գիշերն այս խմբավորումը հարձակում է գործել։ 
Պատգամավորներից ոմանք արդեն երկու տարի հրապարակային խրախուսում են ապօրինությունը` դրանով անպատժելիության անուղղակի խոստում տալով հանցավոր խմբավորման անդամներին։ 
Թերեւս հատկանշական է, որ խմբավորման անդամները երեկ հենց պատգամավորների հետ հանդիպումից հետո գիշերը հարձակում են գործել` սպառնալով տարածքում գտնվող համայնքի բնակիչներին։ Այսօր ԼՀԿ պատգամավոր Անի Սամսոնյանը կասկածի տակ է դրել «Լիդիանի» պահնորդների՝ իրենց «հանդիպումը» նկարահանելու օրինականությունը»,- ասված է հայտարարությունում։

Auroranews-ը կապ հաստատեց «Լուսավոր Հայաստան» խմբակցության պատգամավոր Անի Սամսոնյանի հետ, որը մեզ հետ զրույցում հայտնեց, որ ցավում է, որ  «Լիդիան Արմենիան» ներկայացնելով իրեն օրինավոր ընկերություն այսօր պահում է իրեն սադրիչի պես: 

«Մեր այցերը գաղտնի տեսանկարահանելով և  հրապարակելով դրել են մի վերնագիր, որը ամբողջությամբ կեղտոտ սուտ է և զրպարտություն: Ներկայացրել են, որ մենք խրախուսում ենք որևէ բռնություն և  հանցագործություն, բայց այս ամենը  խոսում է մի բանի մասին, որ «Լիդիան Արմենիան» որևէ գործիքակազմ չունի պաշտպանելու ինքն իրեն»,-ասաց Սամսոնյանը: 

Մեր ճշտող հարցին` ի՞նչ նպատակ է ունեցել այս անգամվա ացելությունը Ամուլսարի տարածք Սամսոնյանը ասաց.

«Մենք  գործնական հանդիպումններ ունեինք Ջերմուկում:  Կարծում եմ յուրաքանչյուր քաղաքացի եթե գնում է Ջերմուկ պետք է կանգնի և հարցնի այդ տղաների որպիսությունը: Ամեն անգամ, երբ այցելում ենք Ջերմուկ հանդիպում ենք պաշտպաններին և հարցնում նրանց որպիսությունը` քննարկում տարբեր թեմաներ և շարունակում ենք մեր ճանապարհը, այս անգամ էլ բացառություն չի եղել»,-նշեց պատգամավորը: 

Հարցին` արդյո՞ք խմբակցությունը կանդրադառնա  «Լիդիան Արմենիայի» հայտարարությանը  պատգամավորը հայտնեց, որ անհրաժեշտության դեպքում կլինեն քննարկումներ խմբակցության ներսում և եթե կարիք լինի «Լիդիան Արմենիայից» կպահանջեն արժանապատվության և բարի համբավի վերականգնում: 

Հիշեցնենք,  որ ավելի վաղ Ամուլսարի հանքի շահագործման դեմ պայքարող, ակտիվիստ Շիրակ Բունիաթյանը իր ֆեյսբուքյան էջում տեսանյութ է հրապարակել, որում մասնավորապես հայտնում է, որ Ամուլսարում ծառայություն իրականացնող պահնորդները հարձակվել են այնտեղ հերթապահող քաղաքացիների վրա և ծեծի ենթարկել նրանց։