Բնապահպանն ահազանգում է՝ Հրազդան գետից հսկայական ծավալով ջուր է լցվում Արաքս գետ և այն օգտագործում է թուրքական կողմը

«Հայկական բնապահպանական ճակատ»-ի անդամ Լևոն Գալստյանն ահազանգում է՝ Արարատյան դաշտից Հրազդան գետով մեծ ծավալով ջուր է գնում և լցվում Արաքս գետ, և այն օգտագործում է թուրքական կողմը։

Իր ֆեյսբուքյան էջում  Լ. Գալստյանը հրապարակել է տեսանյութ, որն արվել է Հովտաշեն գյուղի տարածքից։

«Այստեղով Հրազդան գետն է անցնում, և չորս կմ ճանապարհ անցնելուց հետո գետի ջրերը միանում են Արաքսին։ Ես չեմ կարող ասել՝ ինչ նպատակով է օգտագործվում այս ջուրը։ Բայց այս պահին մեծ քանակությամբ ջուրը գնում է Թուրքիա։ Ու հաճախ, որ ասում են ոռոգման ջուր չկա Արարատյան դաշտում, այստեղ ջուր չկա, սակայն այժմ մեծ քանակով ջուր հենց այստեղից հոսում է»,- ներկայացրեց նա։