Մեկանգամյա օգտագործման պլաստիկը կարգելվի. օրինագիծ ԱԺ-ում

Խորհրդարանը քննարկում է «Առևտրի և ծառայությունների մասին ՀՀ օրենքում լրացում կատարելու մասին» օրենքի նախագիծը, որով առաջարկվում է 2022-ի հուվարի 1-ից արգելել առևտրի իրականացման վայրերում և առևտրի օբյեկտներում մինչև 50 միկրոն հաստության պոլիէթիլենային պարկերի և տոպրակների վաճառքը և իրացումը` բացառությամբ կշռափաթեթավորման և երկրորդային հումքից արտադրվածը: Նախագիծը ներկայացնրեց շրջակա միջավայրի նախարար Էրիկ Գրիգորյանը:

Պատգամավոր Գևորգ Պապոյանը խնդրեց պարզաբանել, թե ինչ է նշանակում մինչև 50 միկրոն հաստությունը, արդյոք խոսքը մեզ ծանոթ տոպրակների մասին է: Ի պատասխան՝ նախարարը պարզաբանեց, որ խոսքը մեզ ծանոթ սուպերմարկետներում և առևտրի ցանցում վաճառվող տոպրակների մասին է, որոնք բոլորն էլ 50 միկրոնից ցածր են, այսինքն՝ բազմակի օգտագործումները ավելի շատ են, և այս նախագծով արգելվելու է մեկանգամյա օգտագործման պլաստիկը:

«Ավելի քան 120 երկրում այս պահին այս կամ այն կերպով իրականացվում են պլաստիկի արգելման գործողություններ, քանի որ ֆիզիկական աղտոտումից բացի՝ պլաստիկի քայքայման հետևանքով այդ միկրոպլաստիկը մտնում է նաև սննդային շղթա, կան կենդանիների, թռչունների, նույնիսկ ձկների մեջ, և ունեն որոշակի կանցերոգեն հատկություններ: Ամբողջ աշխարհը գնում է մեկանգամյա պլաստիկի արգելման ուղղությամբ»,- պարզաբանեց նախարար Գրգորյանը: