«Զոհրաբի դին այսօր կբերեն, տանը սարսափելի վիճակ է»: Երեկ Նախիջևանի սահմանին հակառակորդի կրակոցից զոհված Զոհրաբ Սիանոսյանը Արարատի մարզի Փոքր Վեդի համայնքի բնակիչ էր: 

«Սոցիալապես անապահով ընտանիք են: Նա, կինն ու երեխաները ապրում էին հայրիկի ու մայրիկի հետ, նրանց հետ նաև եղբոր ընտանիքը: Մինչև պայմանագրային ծառայող դառնալը արտագնա աշխատանքի էր գնում, եղբայրն էլ էր դրսում, գիշերն է եկել»,- Lurer.com-ի հետ զրույցում պատմեց համայնքապետ Նորիկ Մարտիրոսյանը:

26 ամյա Զոհրաբը երկու դուստր ունի, մեկը՝ 4, մյուսը 2 տարեկան: Կինն աշխատում է համայնքի ջերմոցներում: Համայնքապետը պատմում է՝ Զոհրաբն իր նախկին աշխատողի որդին է՝ շատ համեստ, խելոք տղա:

«Մի բան հանձնարարեիր՝ առանց մի բառ ասելու կգնար, կաներ: Աշխատասեր ընտանիք են իրենք: Դժբախտություն էր սա, խոսքեր չունեմ»:

Պայմանագրային զինծառայողը ուրբաթ օրվանից է սկսել ծառայությունը:

«3 օր էր ինչ գնացել էր, նոր-նոր երևի փորձել է հունի մեջ ընկնել, այն էլ..., չգիտեմ, գուցե տեղանքին լավ ծանոթ չի եղել, գուցե անզգույշ է եղել, գուցե ուղղակի իրենից չի կախված եղել իրավիճակը»: 

Նշենք, որ երեկ՝ ժամը 15։30-ի սահմաններում, հարավարևելյան հատվածում տեղակայված ՊՆ N զորամասի պահպանության շրջանի մարտական դիրքի ուղղությամբ հակառակորդի կողմից արձակված կրակոցի հետևանքով կրծքավանդակի շրջանում մահացու հրազենային վնասվածք է ստացել պայմանագրային զինծառայող, շարքային Զոհրաբ Գրիգորիի Սիանոսյանը (ծնվ. 1994թ., Արարատի զ/կ):