ՏԵՍԱՆՅՈՒԹ. Իտալիայում գերարագ գնացքն ընթացքի ժամանակ դուրս է եկել գծերից. կան զոհեր և տուժածներ
Իտալիայի Լոդի նահանգում գերաարագընթաց գնացքը դուրս է եկել գծերից, ինչի հետևանքով երկու մարդ մահացել է, տասնյակ մարդիկ վիրավորվել են: Այս մասին հայտնում է CNN-ը՝ հղում անելով երկրի իշխանություններին:
Միջադեպը տեղի է ունեցել հինգշաբթի առավոտյան Կասալպուստերլենգո քաղաքում, որը գտնվում է Միլանից մոտ 50 կմ հեռավորությամբ: Իտալիայի փրկարար ծառայության տվյալներով՝ զոհվել են գնացքի երկու մեքենավարները, 28 մարդ վիրավորվել է:
Դեպքի վայրում աշխատանքներ է իրականացնում ոստիկանությունը: Իտալական երկաթուղային ցանցի տվյալներով՝ գնացքը երթևեկում էր Միլան-Սալերնո երթուղով, երբ տեղի է ունեցել միջադեպը տեղի ժամանակով 5:30-ին (երևանյան 08:30): Նշվում է, որ առավելագույն արագությունը, որով գնացքը կարող էր երթևեկել, 300 կմ/ժամ է: Դեռևս պարզ չէ, թե ինչ արագությամբ էր ընթանում գնացքը:
