Չինաստանում ՀՀ հինգ քաղաքացիների թույլ չի տրվել օգտվել «Ուրալ» ավիաընկերության չվերթից
Չինաստանում Հայաստանի հինգ քաղաքացիներ հայտնվել են դժվար իրավիճակում։ NEWS.am-ի հետ զրույցում նրանցից Լիանա Ստեփանյանը պատմեց, որ այսօր առավոտյան «Ուրալ» ավիաընկերության U6 764 չվերթով Չինաստանի Սիան քաղաքի օդանավակայանից պետք է մեկնեին Ռուսաստանի Եկատերինբուրգ քաղաք, սակայն օդանավակայանում իրենց հայտնել են, որ միայն ՌԴ քաղաքացիները կարող են մեկնել այդ չվերթով։
«Ասացին կոկրետ պատճառ չկա, պաշտոնական փաստաթուղթ չկա, հրաման են ստացել, որ չթողնեն: Միայն հայեր չէին, Բելառուսից, Ղազախստանից էլ կային նաեւ: Խոսեցինք «Ուրալի» ներկայացուցչի հետ, ասացին` ոչինչ չենք կարող անել, որովհետեւ դա ՌԴ որոշումն է։ Դեսպանատուն զանգեցինք, իրավիճակը ներկայացրինք, խնդրեցինք օգնել, սակայն ոչ մի օգնություն չտրամադրեցին»,-պատմեց նա։
Նրանք հայտնեցին, որ այս պահին գնում են Գուանչժոու, նոր տոմս են գնել։
Հիշեցնենք, որ ավելի վաղ հայտնել էինք, որ Ռուսաստանը փակում է գրեթե բոլոր ավիաուղղությունները Չինաստանի հետ՝ կորոնավիրուսի հետ կապված։
