Չինաստանը մի շարք երկրներից ետ է գնում նախկինում վաճառած բժշկական դիմակները

Չինաստանում տարածված կորոնավիրուսի պատճառով այդ երկրում սպառվել են վարակի կանխարգելման նպատակով օգտագործվող բժշկական դիմակները: Այս մասին տեղեկացնում է En Son Haber լրատվականը:

Այսօր Չինաստանը բժշկական դիմակների կարիք ունի, այդ իսկ պատճառով ստիպված է իր արտահանած դիմակները հետ գնել այլ երկրներից: Մասնավորապես Թուրքիայի Դենիզլի քաղաքի բժշկական կենտրոններից մեկի տնօրեն Էրհան Դեմիրելը տեղեկացրել է, որ ավելի վաղ Չինաստանից գնված 300 000 բժշկական դիմակները պատրաստվում են հետ ուղարկել Չինաստան:

Դեմիրելը պատմել է, որ ընկերության գրասենյակի և իր անձնական հեռախոսահամարին անընդհատ զանգեր են գալիս տարբեր երկրներից, դիմում են նաև համացանցի միջոցով` խնդրելով իրենց դիմակներ վաճառել:

«Ամեն տեղից զանգահարում են, 1 միլիոն, 5 միլիոն, 10 միլիոն, անգամ 100 միլիոն դիմակ են ուզում գնել: Քչության պատճառով այն շատ արժեքավոր ապրանք է դարձել: Գինն էլ չեն հարցնում, միայն հարցնում են կա, թե չկա: Այս պահին դիմակները ոսկուց արժեքավոր են դարձել»,-ասել է բժշկական կենտրոնի տնօրենը` նշելով նաև, որ որոշ մարդիկ օգտվում են առիթից և դիմակները վաճառում կրկնակի ու եռակի գնով:

Բժշկական դիմակների ամենախոշոր արտադրողն աշխարհում հենց Չինաստանն է, որը մինչև կորոնովիրուսի ի հայտ գալը նաև արտահանում էր այդ արտադրանքը տարբեր երկրներ։