Նախկին դատավոր Սամվել Ուզունյանի՝ ՀՀ պետական սահմանը հատելու դեպքի առթիվ հարուցվել է քրեական գործ ՀՀ ՔՕ-ի 315-րդ հոդվածի 1-ին մասով (պաշտոնատար անձանց կողմից պաշտոնեական անփութությունը):

Այս մասին «Հայկական ժամանակ»-ը տեղեկացել էԳլխավոր դատախազի խորհրդական Գոռ Աբրահամյանից:

«Հայաստանի Հանրապետության տարածքից Երևան քաղաքի Ավան և Նոր Նորք վարչական շրջանների ընդհանուր իրավասության դատարանի նախկին նախագահ Սամվել Ուզունյանի հնարավոր ելքը կանխելուն ուղղված միջոցառումների ձեռնարկման պայմաններում վերջինիս կողմից ՀՀ «Զվարթնոց» սահմանային անցակետով ՀՀ-ից մեկնելու դեպքի առթիվ պետական ծառայություն իրականացնող պաշտոնատար անձանց կողմից պաշտոնեական անփութության հատկանիշներով՝  ՀՀ քրեական օրենսգրքի 315-րդ հոդվածի առաջին մասով հարուցվել է քրեական գործ և ընդունվել ՀՀ ՀՔԾ վարույթ»,-փոխանցեց Աբրահամյանը:

Հիշեցնենք՝ դեկտեմբերի 21-ին Բարձրագույն դատական խորհուրդը համաձայնություն տվեց Սամվել Ուզունյանի նկատմամբ քրեական հետապնդում հարուցելուն և նրան ազատությունից զրկելուն: Դեկտեմբերի 23-ին հայտնի դարձավ, որ դատավոր Ուզունյանը ներգրավվել է որպես մեղադրյալ, եւ նրա նկատմամբ հայտարարվել է հետախուզում. նա հատել էր սահմանը հենց այն օրը, երբ դատարանը նրան կալանավորելու որոշում էր կայացրել: Նշենք նաեւ, որ Ուզունյանի ճամպրուկում հայտնաբերվել էր փամփուշտ, ինչի առթիվ էլ ծառայողական քննություն է  նշանակվել: