Երևանի ընդհանուր իրավասության դատարանի դատավոր Մնացական Մարտիրոսյանը 14-րդ անգամ մերժեց ԵԿՄ նախկին նախագահ Մանվել Գրիգորյանի պաշտպանների 2 միջնորդությունները։ Առողջական խնդիրների պատճառով դատական նիստին Մանվել Գրիգորյանը կրկին ներկա չէր։

Պաշտպանները 2 միջնորդություն էին ներկայացրել․ առաջինը 1 միլիարդ 336 միլիոն 760 հազար  դրամի՝ 25 միավոր անշարժ գույքի գրավի միջնորդությունն էր, մյուսը՝ ստորագրությամբ բաց թողնելը։

Մանվել Գրիգորյանի գործով հաջորդ դատական նիստը նշանակվել է 2020 թվականի հունվարի 21-ին՝ ժամը 14։00-ին։

Ավելի վաղ հայտնել էինք, որ Մանվել Գրիգորյանի գործն իր կնոջ՝ Նազիկ Ամիրյանի գործից, անջատվել էր։ Մանվել Գրիգորյանի պաշտպանները Վերաքննիչ դատարան բողոքարկել էին Երևանի ընդհանուր իրավասության դատարանի դատավոր Մնացական Մարտիրոսյանի՝ նոյեմբերի 5-ի որոշումը, որով մերժվել էր Մանվել Գրիգորյանի նկատմամբ ընտրված խափանման միջոց կալանավորումը գրավով փոխարինելու միջնորդությունը: Վերաքննիչ դատարանը դեկտեմբերի 17-ին մերժել է պաշտպանների բողոքը։

Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու եւ շորթմամբ 37 միլիոն դրամ արժողությամբ գույքի հափշտակությունը կազմակերպելու մեջ: