‹‹Գուցե չպատկերացնեք, բայց ժամեր են տևում գյուղից գյուղ հասնելը, Երևան հասնելու մասին էլ խոսք չկա, օր կա կարողանում ես ժամանակին հասնել, օր էլ կա ստիպված ուշանում ես››,- Auroranews.am-ին պատմեց Լուսակերտ գյուղի բնակիչ Կարինե Գևորգյանը:  

Տիկին Գևորգյանը  ապրում է Կոտայքի մարզի Լուսակերտ գյուղում, սակայն աշխատում նույն մարզի Քարաշամբ գյուղում: Բնակչուհին պատմում է, որ արդեն երկար ժամանակ է ինչ չի լուծվում գյուղերում սպասարկող երթուղայինի հարցը և աշխատանքի հասնելը գյուղացիների համար դարձել  է լուրջ խնդիր, քանի որ տրանսպորտ չկա և ստիպված տաքսիներով են երթևեկում: 

‹‹Գյուղը սպասարկում է միայն մեկ տրանսպորտ`  թիվ 253 համարի միկրովտոբուսը, որը օրվա մեջ գյուղացիներին սպասարկում է ընդամենը 4 անգամ,  սակայն նրա մեր գյուղ մտնելը անգամ անիմաստ է դառնում քանի որ մինչև մեր գյուղ հասնելը նույն 253 համարի միկրովտոբուսը անցնում է 3 գյուղով: Երբ հասնում է մեզ արդեն տեղ չկա, ստիպված աշխատանքից չուշանալու համար տաքսիներով ենք գնում: Իսկ ուսանողների խնդիրը ավելի մեծ է, երբ տանից դուրս են գալիս վստահ չեն կկարողանան հասնել Երևան՝ դասի, թե ոչ››,- պատմում է Կարինե Գևորգյանը: 

Խնդրին տեղեկանալու համար Auroranews.am-ը զանգահարեց  Քարաշամբ գյուղի համայնքապետարան, որտեղից մեզ պատասխանեց աշխատակազմի քարտուղար Արման Սմբատյանը:    

Սմբատյանը չհերքեց, որ ինչպես Քարաշամբ համայնքին, այնպես էլ Լուսակերտ և Թեղենիք համայնքներին սպասարկում է միայն այդ 253 համարի երթուղին, ինչպես նաև չհերքեց այն, որ երթուղին  աշխատում է օրը 4 անգամ: Սմբատյանն ասաց, որ հիմնական խնդիրը կապված է վարորդների հետ. 

‹‹Շատ են բողոքում, որ երբեմն մտնում են գյուղեր ու  դատարկ դուրս գալիս, ասում են անիմաստ գազ ենք ծախսում։ Իրենց էլ կարելի է հասկանալ,  գյուղերի բնակչությունը բավականին քիչ է, երթուղայինի ժամերն էլ անհարմա։ Ցերեկվա ընթացքում հիմնականում շարժ չի լինում, իսկ առավոտյան և երեկոյան, իհարկե, մարդիկ ավելի շատ են: Բաց խնդրի լուծման հարցում համայնքը որևէ գործ չի կարող անել››,- ասաց Սմբատյանը: 

Արման Սմբատյանը նաև տեղեկացրեց, որ  համայնքապետարանը դիմել է  Կոտայքի մարզպետարան, ՀՀ տարածքային կառավարման և ենթակառուցվածքների նախարարություն և խնդրի մասին տեղյակ պահել: 

Մեր հարցին՝ կա՞ն կոնկրետ առաջարկներ կամ ստացված պատասխաններ նախարության կամ մազրպետարանի կողմից պարոն Սմբատյանը նշեց, որ բոլոր դիմումներն ու պատասխանները եղել են գրավոր կերպով և հիմա կոնկրետ չի հիշում, թե ինչ պատասխան են ստացել:  
Երբ խնդրեցինք հստակեցնել և թեկուզ ստացված գրավոր պատասխանը սոցցանցով ուղարկել, պարոն Սմբատյանը  ժամանակ խնդրեց, որպեսզի գտնի ստացված տվյալները և խնդրեց զանգահարել մեկ օրից:  Հաջորդ օրը զանգահարելով նույն հեռախոսհամարին մեզ պատասխանեց արդեն Քարաշամբ գյուղի համայնքապետ Զորիկ Խլղաթյանը: Երբ համայնքապետին  տեղեկացրինք զանգի նպատակի և մեզ խոստացված պատասխանների մասին, համայնքապետը մասամբ հերքեց այն, ինչ ասել էր համայքնի աշխատակազմի քարտուղարը:  

Ըստ համայնքապետի չի եղել որևէ գրավոր դիմում նախարարությանը կամ մարզպետարանին, բայց եղել է  խորհրդակցություն Կոտայքի մարզպետ Ռոմանոս Պետրոսյանի հետ, որը ըստ համայնքապետի քաջատեղյակ է խնդրին:  

Համայնքապետը պատմեց, որ իրականում խնդիրը ավելի լուրջ է,  իրենց գյուղը միջանկյալ գյուղ է, և ըստ նախնական տվյալների  տրանսպորտը Բջնիից գալիս է և անցնում Արգել գյուղ, հետո Թեղենիք, հետո Քարաշամբ, իսկ հետո Լուսակերտ: 
Մեզ հետ զրույցում համայքնապետը նշեց, որ Քարաշամբի և Թեղենիքի համայնքապետեր խնդրել են , որ երթուղին գոնե առավոտյան մեկ անգամ մտնի  հարակից Թեղենիք համայնք, որպեսզի ուսանողներին տանի Երևան:  

«Խնդրել ենք  որ երթուղին մտնի նաև Թեղենիք, մեղք են մարդիկ, հնարավորություն չկա անգամ, որ ուսանողները դասի գնան»,- ասաց պարոն Խլղաթյանը: Մեր հարցին՝ ո՞նց են գյուղ վերադառնալու ուսանողները դասից հետո նա չտվեց կոնկրետ պատասխան: 
Խնդրի մասին զրուցեցինք  ՀՀ Տարածքային կառավարման և ենթակառուցվածքների նախարարության Ավտոմոբիլային տրանսպորտի վարչության պետի ժամանակավոր պաշտոնակատար Արման Կարապետյանի հետ, որը մեզ հետ զրույցում ասաց, որ առաջին անգամ է լսում  այս մասին, քանի որ այսքան ժամանակ որևէ գրավոր դիմում չի եղել:  

‹‹Թիվ 523 համարի երթուղին ունի հստակ գրաֆիկ և ըստ գրաֆիկի պետք է աշխատի և սպասարկի այն համայքներին, որոնք սպասարկել է նախկինում կամ որոնց համար ունի կնքած պայմանագիր: Եթե կա սահմանված  երթ, բայց փոխադրողը կամայականորեն քիչ է սպասարկում, այդ պարագայում տվյալ եթուղին պետք է բացահայտել և ենթակել վարչական տույժի››,- ասաց Կարապետյանը:  

Անդրադառնալով Թեղենիք համայնքի խնդրին Կարապետյանը նշեց, որ առաջին անգամ է լսում, որ համայնքապետերի խնդրանքով երթուղին կարող է մտնել գյուղ առավոտյան մեկ անգամ:  

‹‹Հնարավորինս շուտ կզբաղվենք այս հարցով, բայց լավ կլինի եթե համայնքները գրավոր դիմում ներկայացնեն նախարարություն, որից հետո վստահ եմ քննարկումների շնորհիվ կգտնվի համայնքների համար նպաստավոր լուծում ››,- հավելեց Արման Կարապետյանը:  

Ջեմմա Սարդարյան