Քննչական մարմիններն ուղղակի գործադիր իշխանության ազդեցության տակ են գտնվում. Քոչարյան

Վերաքննիչ քրեական դատարանում՝ Մարտի 1-ի գործով ընթացող դատական նիստին, նախագահող դատավոր Մխիթար Պապոյանին հայտնած ինքնաբացարկի վերաբերյալ ելույթ ունեցավ նաեւ ամբաստանյալ Ռոբերտ Քոչարյանը:

Վերջինս, միանալով պաշտպանների առարկությանը, ասաց. «Պարոն Ալումյանը փորձեց ներկայացնել, որ միջնորդությամբ ձեւավորվելու է մի գործիք, որը երկու կողմն էլ կարող է օգտագործել ընդհանրապես դատական պրակտիկայում: Իմ կողմնակիցները կարող են «Ֆեյսբուք»-ով սկսել կարծիք հայտնել դատախազների, այլ դատավորների, ցածր վարկանիշ ունեցող դատախազների վերաբերյալ, հակառակ կողմը կարող է սկսել կարծիք հայտնել բարձր վարկանիշ ունեցող դատավորների նկատմամբ, բայց այս գործիքը միակողմանի օգտագործվող գործիք է»,- ասաց նա:

Ռոբերտ Քոչարյանի խոսքով՝ Քննչական մարմիններն ուղղակի գործադիր իշխանության ազդեցության տակ են գտնվում. «Այդ ճանապարհով հնարավոր կլինի չեզոքացնել իրենց համար անցանկալի դատավորներին, շարքից հանել կոնկրետ քրեական գործերով: Պետք է սրա դեմն առնել, եւ չստեղծել նման պրակտիկայի հետագա հնարավորություն»,- նշեց նա: