Խաժակյանը Երևանի ամանորյա ծախսերի ծրագիրը համեմատեց Նոր տարվա «բդի» հետ
«Մեր այս քվեարկությունը կամ Կառավարության կողմից տրվող այս գումարը նման է այն ընտանիքներին, ովքեր կենցաղային խնդիրներ են ունենում, բայց վարկ են վերցնում, որ Նոր տարվա բուդը ապահովեն: Հիմա մենք ավելի քան 300 մլն տրամադրում ենք, որ քաղաքի տոնակատարությունները ապահովենք»,- ավագանու նիստի ժամանակ ասաց «Լույս» խմբակցության ղեկավար Դավիթ Խաժակյանը, երբ արտահերթ նիստում քննարկվում էր Ամանորի միջոցառումներին Երևանի համար 320 մլն դրամ նախատեսված ծախսերի ծրագիրը:
Դավիթ Խաժակյանը նշեց, որ տարակուսելի է, երբ խոսում ենք այս մեծ ծախսի մասին, բայց ասում ենք, որ կենցաղային ու կոմունալ խնդիր լուծելու համար մասնավոր միջոցներ պետք է ներգրավել: Նա նաև տեղեկացրեց, որ «Լույս» խմբակցությունը նախագծին ոչ թե դեմ, այլ ձեռնպահ է քվեարկելու:
«Հասկանալի է, որ դեմ լինել ճոխ տոնակատարություններին հնարավոր չէ, որովհետև ունենք այդնիսի ընտանիքներ, որ վարկ կամ ապառիկ են վերցնում Նոր տարվա բուդը դնելու համար, բայց իրենց մի շարք կենցաղային խնդիրներ մնում են չլուծված»,- եզրափակեց խոսքը Խաժակյանը:
