Ի՞նչ հիմքով պետք է պահանջեն. Մակունցը՝ Աշոտյանի արտահերթ ընտրություններ անցկացնելու հայտարարության մասին
«Պարոն Աշոտյանի ասուլիսին չեմ հասցրել ծանոթանալ, բայց ծանոթ եմ այն հայտարարությանը, որն արել է ՀՀԿ-ն»,- լրագրողների հետ զրույցում, անդրադառնալով Արմեն Աշոտյանի այն հայտարարությանը, թե Սերժ Սարգսյանին առաջադրված մեղադրանքն օդ է և այն կուժեղացնի հականիկոլական կոալիցիան, ասաց «Իմ քայլը» խմբակցության ղեկավար Լիլիթ Մակունցը:
Նրա խոսքով՝ այն միտումը, որով փորձ է արվում որակել մեղադրանքը որպես քաղաքական հետապնում, չի կարող ընդունելի լինել:
«Ուզում եմ հիշեցնել, որ նույն օրը կոռուպցիայի հետ կապված տեղի է ունեցել երկու հանրային հրապարակում: Մեկն առնչվել է Սերժ Սարգսյանին, մյուսը՝ ԿԳՄՍ փոխնախարար Գևորգ Լոռեցյանին: Հետևաբար, եթե կոռուպցիայի դեմ մղվում է պայքար, ապա այդ առումով չկա զիջում՝ կապ չունի մեր թիմակիցն է, թե ընդդիմադիր: Այնպես որ բոլոր նման որակումներն անընդունելի են: Մենք վերահաստատում ենք, որ կոռուպցիայի առումով ոչ մի զիջում չի լինելու»,- նշեց նա:
Մակունցն ընդգծեց, որ բնականաբար ՀՀԿ-ականները այս ամենը պետք է փորձեն ներկայացնել որպես քաղաքական հետապնդում:
Խոսելով Աշոտյանի այն հայտարարության մասին, թե պահանջում են արտահերթ խորհրդարանական ընտրություններ, Մակունցը նշեց. «Ի՞նչ հիմքով դա պետք է պահանջեն, չեմ ուզում դրան նույնիսկ անդրադառնալ»:
