Երևանի ընդհանուր իրավասության դատարանը բավարարեց Հայաստանի նախկին Գլխավոր դատախազ Գևորգ Կոստանյանին կալանավորելու՝ Հատուկ քննչական ծառայության միջնորդությունը:

Դատարանի որոշումը Կոստանյանի պաշտպաններն անհիմն են համարում: Պատրաստվում են բողոքարկել այն:
«Ամբողջը ենթադրություններ էին: Ավելին ասեմ, քննիչի կողմից ներկայացված բոլոր փաստարկները վկայում էին հակառակի մասին, որ Գևորգ Կոստանյանը առնչություն չունի իրեն մեղսագրվող մեղադրանքին», - ասել է Կոստանյանի փաստաբաններին Համբարձում Մելիք-Սարգսյանը:

Գևորգ Կոստանյանի նկատմամբ Հատուկ Քննչական ծառայաությունը հետախուզում է հայտարարել, քանի որ նախկին Գլխավոր դատախազը 48 ժամվա ընթացքում չի ներկայացել վարույթն իրականացնող մարմին՝ մեղադրանք առաջադրելու համար։

«Ազատության» հետ հեռախոսազրույցում Կոստանյանն ասել էր՝ ժամանակին քննիչին հայտնել է, որ Մոսկվայում աշխատում է, դասընթաց է վարում, և կվերադառնա այն ավարտելուց հետո:

Նախկին Գլխավոր դատախազը իրեն տրված ժամանակահատվածը ողջամիտ չէր համարել ու հստակ չէր պատասխանել հարցին, թե արդյոք դեկտեմբերին, դասերն ավարտելուց հետո վերադառնալո՞ւ է Հայաստան, թե՞ ոչ։

Այսօր նրա պաշտպանը հստակ չասաց, թե երբ է Կոստանյանը պատրաստվում վերադառնալ Հայաստան, միայն վստահեցրեց, որ ավելի վաղ նախկին պաշտոնյան որոշել էր դեկտեմբերին ներկայանալ վարույթն իրականացնող մարմնին․ - «Հիշյալ որոշման պայմաններում արդեն պարոն Կոստանյանը կորոշի, թե երբ կներկայանա: Նախնական պայմանավորվածությամբ, պարոն Կոստանյանը գալու էր սեսիայի ավարտից հետո: Ուղղակի էս որոշումը դեռ պետք է բողոքարկենք»:

Գևորգ Կոստանյանը մեղադրյալ է ներգրավվել Մարտի 1-ի գործով: Թե ինչ հոդվածներով՝ Հատուկ Քննչական ծառայությունը դեռ չի պարզաբանում։