Ո՞ր հարցում պետք է կանգ առնի Նիկոլ Փաշինյանը. Արթուր Վանեցյան
Մեղադրել ինձ նրանում, որ ես «Կանգ առ»-ի կոչ եմ արել կոռուպցիայի դեմ պայքարին, ուղղակի ծիծաղելի է։ Ես՝ ստանձնելով ՀՀ ԱԱԾ տնօրենի պաշտոնը, իմ ղեկավարած հիմնարկը 1.5 տարիներում եղել է կոռուպցիայի դեմ պայքարի առաջամարտիկը։ Դրա մասին բազմիցս խոսվել է երկրի քաղաքական ղեկավարության կողմից, դրական է ընկալվել հասարակության կողմից, բոլորը տեսել են, թե ինչ ահռելի աշխատանք է կատարել ԱԱԾ-ն:
«Ես չեմ կարող ասել «Կանգ առ» մի երևույթի, որը մեր երկրի չարիքն է, որը խարխլում է երկրի հիմքերը։ Կոռուպցիայի դեմ պայքարը այլընտրանք չունի։ Կոռուպցիայի դեմ պետք է պայքարել շատ խիստ և մշտապես, և դա ես և իմ ղեկավարած կառույցը ապացուցել ենք այս 1,5 տարիներին, երբ եղել եմ ԱԱԾ տնօրեն»։
Ո՞ր հարցում պետք է կանգ առնի Նիկոլ Փաշինյանը: Այս հարցին Վանեցյանը պատասխանեց. «Եկեք այս հարցը թողեմ անպատասխան, բայց խոստանում եմ, որ առաջիկայում կխոսեմ ամեն ինչի մասին, մանրամասն կներկայացնեմ իմ տեսակետները երկրում ստեղծված մթնոլորտի և իրավիճակի մասին»: Հաջորդ հարցին` երբևէ Նիկոլ Փաշինյանը դժգոհե՞լ է իր աշխատանքից, նա ասաց․ «Այս հարցի հասցեատերը Նիկոլ Փաշինյանն է»։
