Էլեկտրաէնրգիայի և գազի սակագների փոփոխություն առայժմ չի սպասվում. Բաղրամյան

Հանրային ծառայությունները կարգավորող հանձնաժողովն այս պահին քննարկում է հայկական էլեկտրակայանի նորոգման ժամկետների հետ կապված հիմնական խնդիրը։

Հանձնաժողովի նախագահ Գարեգին Բաղրամյանը լրագրողների հետ զրույցում ասաց, որ 2020 թվականին որոշակի աշխատանքների ճշտման հարց կա, թե քանի օրով է ատոմակայանը կանգնելու նորոգման։

«Ցանկացած տարի գիտեք այն կանգնում է լիցքավորման եւ նորոգման, սակայն վերջին 2–3 տարում դրանք ավելի երկար կանգառներ էին, կապված նաեւ կյանքի ժամկետի երկարաձգման հետ։ Հիմա ճշգրտվում են այդ աշխատանքների վերջնական գրաֆիկները, համաձայն որի կորոշվի, թե որքան ժամանակով է կայանը կանգնելու։ Դրանից ելնելով կունենանք ընդհանուր հաշվեկշիռը, որը էլեկտրաէներգիայի սակագների ձեւավորման հիմնական ազդեցություն ունեցող գործոնն է։ Կարծում եմ բավականին ռեսուրսներ կգտնվեն, որպեսզի գործող գները նույնը մնան»։

Անդրադառնալով գազի գնին՝ Բաղրամյանն ասաց, որ մինչեւ ապրիլ գազի գինը նույնը կմնա։

«Ինչպես տեղեկացրել է փոխվարչապետ Գրիգորյանը՝ բանակցության արդյունքում նման միջանկյալ որոշում է կայացվել, իսկ հիմնական երկարաժամկետ սակագնային պլանը դեռեւս քննարկվում է, շատ բան կախված է նրանից, թե սահմանին գազի գնի համար ինչ գին կսահմանվի»։