ՏԵՍԱՆՅՈՒԹ. Բաթումում անձրևների պատճառով մարդիկ ստիպված են տներից դուրս գալ փչովի նավակներով
Բաթումի փրկարարները հորդառատ անձրևների հետևանքով նախօրեին ստիպված են եղել աշխատել ողջ գիշեր: Այդ մասին հայտարարել է Վրաստանի ՆԳՆ արտակարգ իրավիճակների ծառայությունը: Ջրառատ անձրևների պատճառով Մեջինիսցկալի գետը դուրս էր եկել ափերից՝ հեղեղելով քաղաքի ծայրամասի փողոցները:
Կանչերի մեծ մասը եղել է բազմահարկ շենքերի առաջին հարկի բնակիչների կողմից, որոնց բնակարանները ողողվել էին անձրևաջրերով: Ողջ գիշեր փրկարարներն օգնություն են ցուցաբերել բնակչներին՝ ձեռքի տակ ունենալով նաև փչովի նավակներ:
Հորդառատ անձրևների հետևանքով Աջարիայում արձանագրվել է նաև սողանքի երկու դեպք, վնասվել է մեկ կամուրջ:
Զոհերի մասին չի հաղորդվում: Այժմ Աջարիայում չի անձրևում, եղանակը պարզվել է: Առանձին շրջաններում շարունակվում են բնակարաններից ջրահեռացման աշխատանքները:
