Արսեն Արծրունին «Դրոյի» գործով ցմահ ազատազրկված կիսափակից տեղափոխվել է կիսաբաց ՔԿՀ

Այսօր երկու ցմահ դատապարտյալ կիսափակ ռեժմի քրեակատարողական հիմնարկից տեղափոխվել են կիսաբաց ռեժիմի հիմնարկ: Այս մասին այսօր լրագրողների հետ զրույցում ասաց արդարադատության նախարար Ռուստամ Բադասյանը, ով այսօր այցելել էր «Արմավիր» քրեակատարողական հիմնարկ։   
«Երկու ցմահ դատապարտյալ հենց այս`«Արմավիր» քրեակատարողական հիմնարկից, տեղափոխվել են Սևան քրեակատարողական հիմնարկ: Նրանցից մեկը Արսեն Արծրունին է, մյուսը՝ Աշոտ Մանուկյանը»,-ասաց նախարարը: 

Հիշեցնենք, որ Արսեն Արծրունին «Դրոյի» գործով է ցմահ ազատազրկված: Արսեն Արծրունին ազատազրկված է 1994-ի դեկտեմբերից՝ 1996-ի դեկտեմբերի 10-ի Գերագույն դատարանի դատավճռով՝ սպանությունների պատվեր տալու մեղադրանքով: 2003-ին նախագահի կողմից մահապատիժը փոխարինվել է ցմահ ազատազրկմամբ: Այս գործով 2 անձ է կրում ցմահ պատիժ: 

Իսկ Աշոտ Մանուկյանը 1996 թվականից անազատության մեջ է գտնվում: Նա մեղադրվել է երեք զինծառայողի սպանության համար և գնդակահարության դատապարտվել, սակայն դատավճիռն ի կատար չի ածվել, և 2003 թվականին նրա պատիժը ևս փոխարինվել է ցմահ ազատազրկմամբ: