Հրայր Թովմասյանի աղջիկների բացատրության բովանդակությունից հասկացանք, որ հարցերը հիմնականում վերաբերում էին նրանց սեփականության իրավունքով պատկանող գույքերին, որոնք, ըստ էության, շատ չեն:

 Այս մասին լրագրողներին հայտնեց Սահմանադրական դատարանի նախագահ Հրայր Թովմասյանի դուստրերի և հոր փաստաբան Հայկ Սարգսյանը:

«Ավագ աղջկա դեպքում համապատասխան գույքը ավտոտնակ է Կենտրոն վարչական շրջանում, որը 2016 թվականի նվիրատվությամբ ստացել է իր մորաքրոջ աղջկանից, իսկ կրտսեր աղջկա միակ գույքը 2014 թվականի արտադրության «Նիսան սենտրա»  ավտոմեքենան է, որը կրկին 2016 թվականին ստացել է իր մորաքրոջ աղջկանից»,-ասաց նա: Նա նշեց, որ մորաքրոջ աղջիկը մշտապես բնակությամբ մեկնել է ԱՄՆ և իր գույքը նվիրել է քույրերին:

«Որոշակի հարց եղել է կարճ ժամանակահատվածում ավագ դստերը պատկանող «Նիսան պատրուլ» ավտոմեքենայի վերաբերյալ, որը Ապրիլյան պատերազմի ընթացքում նվիրաբերել է Արցախի պաշտպանության բանակին»,-ասաց նա և նշեց, որ Հրայր Թովմասյանի գործունեության հետ կապված որևէ հարց չի տրվել դուստերին:

Պաշտպան Ամրամ Մակինյանը նշեց, որ Հրայր Թովմասյանի հոր հետ կապված հարցերը եղել են տանիքի վերաբերյալ: «Երբ է վերանորոգվել, ինչ միջոցներով, պարզ հարցեր են տրվել: Վերանորոգվել է 2007 թվականին` Վարդան Թովմասյանի միջոցներով` հարևանների  օգնությամբ»,-ասաց նա:

Հիշեցնենք, որ «ՀՀ իրավական մարտահրավերները» խորագրով քննարկման մասնակից իրավապաշտպաններն այս պահին երթով ուղևորվում են ՀՀ ԱԱԾ:

Այսօր ԱԱԾ-ում հարցաքննվում էր ՍԴ նախագահ Հրայր Թովմասյանի հայրը՝ 75-ամյա Վարդան Թովմասյանը, ում ինքնազգացողությունը վատացել է, ինչի համար նա լքել է ԱԱԾ-ն: