Հայաստանի և Ադրբեջանի արտգործնախարարները մինչև տարեվերջ կհանդիպեն

ԵԱՀԿ Մինսկի խմբի համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա), Էնդրյու Շոֆերը (ԱՄՆ), ինչպես նաև ԵԱՀԿ գործող նախագահի անձնական ներկայացուցիչ Անջեյ Կասպրշիկը հոկտեմբերի 14-17-ը տարածաշրջան կատարած իրենց այցելությունից հետո հայտարարություն են տարածել:

Հաղորդագրության մեջ նշվում է, որ հոկտեմբերի 15-ին համանախագահները Երևանում հանդիպել են ՀՀ վարչապետ Նիկոլ Փաշինյանին, իսկ հոկտեմբերի 17-ին Բաքվում հանդիպել են Ադրբեջանի նախագահ Իլհամ Ալիևին և խորհրդակցություններ են անցկացրել երկու երկրների արտաքին գործերի և պաշտպանության նախարարների հետ:

«Այցի ընթացքում համանախագահները հանդիպել են նաև Լեռնային Ղարաբաղի դե ֆակտո իշխանությունների հետ: Բաքվում համանախագահները հանդիպել են Լեռնային Ղարաբաղի ադրբեջանական համայնքի նախագահի հետ: Լեռնային Ղարաբաղում գտնվելու ընթացքում համանախագահները մարդասիրական հարցերի շուրջ զրույց են ունեցել նաև Կարմիր խաչի միջազգային կոմիտեի ներկայացուցչի հետ»,- նշված է հայտարարությունում:

Երկու երկրների ղեկավարները համանախագահներին ներկայացրել են Աշգաբադում ԱՊՀ գագաթնաժողովի շրջանակում իրենց վերջին երկխոսության մանրամասները և իրենց տեսլականը, թե ինչպես է հնարավոր առաջ մղել կարգավորման գործընթացը:

Համանախագահները ողջունել են հասարակություններին խաղաղությանը նախապատրաստելուն և լարվածությունը թուլացնելուն ուղղված մարդասիրական և անվտանգության յուրահատուկ միջոցառումների ձեռնարկման հեռանկարները:

«Համանախագահները ևս մեկ անգամ ընդգծել են մշտադիտարկման առաքելությունների ծայրահեղ անհրաժեշտությունը, որոնք իրականացվում են ԵԱՀԿ գործող նախագահի մշտական ներկայացուցչի հովանու ներքո, նրա մանդատին ու երկարատև փորձառությանը համապատասխան: 

Համանախագահները կողմերին կոչ են արել լիարժեք սատարել ԵԱՀԿ գործող նախագահի մշտական ներկայացուցչի և նրա թիմի գործողություններին և ապահովել մշտադիտարկման առաքելությունների հնարավոր խոչընդոտների անհապաղ վերացումը: Արտաքին գործերի նախարարները հաստատել են մինչև տարեվերջ համանախագահների հովանու ներքո հանդիպելու պատրաստակամությունը: Համանախագահները շուտով կմեկնեն Վիեննա՝ հանդիպելու ԵԱՀԿ մշտական խորհրդի և Մինսկի խմբի երկրների ներկայացուցիչներին»,- նշված է հայտարարության մեջ: