Սանասարյանի քրեական գործը՝ մեղադրական եզրակացությամբ դատախազությունում է
Դավիթ Սանասարյանի հետ կապված քրեական գործը՝ մեղադրական եզրակացությամբ, Դատախազությունը ստացել է։
Այսօր՝ լրագրողների հետ զրույցում, նման հայտարարություն արեց ՀՀ գլխավոր Դատախազ Արթուր Դավթյանը՝ պատասխանելով հարցին, որ ՊՎԾ նախկին պետ Դավիթ Սանասարյանի պաշտպանական թիմը դիմել է դատախազություն, որպեսզի Սանասարյանի նկատմամբ քրեական հետապնդումը դադարեցվի։
«Նախաքննության նկատմամբ հսկողություն իրականացնող դատախազը պետք է իրականացնի իր հսկողական, դատավարական ղեկավարման գործառույթները, որից հետո նոր որոշում կլինի»,-ասաց դատախազը։
Հարցին՝ անձամբ ինքը կարծո՞ւմ է, որ պետք է դադարեցվի քրեական հետապնդումը, Արթուր Դավթյանը պատասխանեց․ «Եթե հիմա որոշակի տեսակետ ասեմ, հուսով եմ՝ կհամաձայնեք, որ կկաշկանդեմ հսկող դատախազին։ Հսկող դատախազը կիրացնի իր դատավարական գործառույթները: Երբ ես իմ գործառույթները կիրականացնեմ՝ որպես գլխավոր դատախազ, այդ ժամանակ կասեմ»։
Հիշեցնենք, որ պետական վերահսկողական ծառայության պետ Դավիթ Սանասարյանի պաշտպանական խումբը նրա նկատմամբ հարուցված քրեական հետապնդումը դադարեցնելու միջնորդություն է ներկայացնել դատախազություն:
