Եթե բախումներ լինեն Ամուսարի հարցով, ոչ թե դեմ և կողմ, այլ երկուսի մեջտեղում կլինեմ. Հովսեփյան

ԱԺ «Իմ քայլը» խմբակցության պատգամավոր Սոֆիա Հովսեփյանի՝ Ամուլսարի հանքի շահագործման հետ կապված իր դիրքորոշումը չի փոխել՝ դեմ եղել է, հիմա էլ դեմ է։ Նա ԱԺ-ում լրագրողների հետ զրույցում նկատեց, որ «ԷԼԱՐԴ» ընկերության փորձաքննության մեջ էլ նշվում է ռիսկերի մասին։

««ԷԼԱՐԴ»-ի գնահատականը, որ բերել էր հանքի շահագործման ռիսկերի մասին, նշվում էր, որ խնդիր չի լինի, եթե ռիսկերը կառավարելի լինեն, իսկ ռիսկերի դեպքում գիտենք, որ ռիսկերն այդքան էլ կառավարելի չեն կարող լինել։ Պարզ է, որ ուղղակիորեն հնարավոր չի լինում զրոյացնել ռիսկերը», - ասաց Հովսեփյանը:

Պատգամավորը չի հերքում, որ ԱԺ մեծամասնության կազմող «Իմ քայլը» խմբակցությունում հանքի շահագործման հետ կապված եղել է տարաձայնություն։ Նա հիշեցրեց, որ խմբակցությունում կան մարդիկ, որոնք մինչև պատգամավոր դառնալը դեմ եմ արտահայտվել Ամուլսարի հանքի շահագործմանը։

«Կան մարդիկ, ովքեր մինչև ԱԺ ձևավորումը, մինչև անգամ հեղափոխությունը, այդ թվում՝ նաև ես, եղել են Ամուլսարի հարցերով պայքարողներից, և խնդիրները, որոնք ի սկզբանե բարձրաձայնվել են, բնական է, որ այսօր արդեն որպես իշխանության ներկայացուցիչ մոռացության պիտի չտան»,- ընդգծեց Հովսեփյանը:

Սոֆիա Հովսեփյանը, պատասխանելով հարցին, թե ո՞ւմ կողմը կկանգնի, եթե բախումներ լինեն, Հովսեփյանը նշեց. «Ոչ թե դեմ և կողմ, այլ երկուսի մեջտեղում»։