6-ամյա աղջնակին գետնին քարշ տալու դեպքով զբաղվում է ոստիկանությունը

SHAMSHYAN.com-ի տեղեկություններով՝  սեպտեմբերի 4-ին, արտակարգ դեպք է տեղի ունեցել Երևանի դպրոցներից մեկում:

Էրեբունի վարչական շրջանի Տիգրան Մեծի պողոտայում գտնվող Աղասի Խանջյանի անվան թիվ 53 դպրոցի պահակը դպրոցից դուրս հանելու նպատակով բռնել է նույն հասցեում գործող «Այբ Բեն Գիմ» զարգացման կենտրոնի 6-ամյա Է. Ծ.-ի ձեռքից, գցել հատակին և քարշ տվել, ինչի հետևանքով երեխային պատճառվել են մարմնական վնասվածքներ:

 Տնօրեն Արմինե Դավթյանի  տեղեկացրել է, որ 6-ամյա աղջիկը, որի հետ տեղի է ունեցել դեպքը, աուտիզմ ունի.

«Այդ երեխան մեր կենտրոնի սան է, ամեն օր մայրը երեխայի հետ գնում է 53 դպրոցի բակ` զբոսնելու: Երեխան աուտիզմ ունի, աղջիկ է, հաճախ կարող է կծել, գետնին պառկել, եթե իր ուզած տեղը չգնա: Իմ տեղեկություններով` դպրոցի տնօրենը խնդրել է դուրս գալ բակից, որ դուռը փակի (երեկոյան ժամը 17։00-ն է եղել), մինչ մայրը վազել է երեխայի պայուսակի հետևից, պահակը քաշքշել է երեխային»:

Արմինե Դավթյանը տեղեկացրել է, որ այդ երեխայի մայրը ևս ունի առողջական խնդիրներ:

Կրթության գիտության մշակույթի և սպորտի նախարարության լրատվական ծառայությունից  հայտնեցին, որ նախարարությունը դատապարտում է երեխաների հանդեպ բռնություն կիրառելու ցանկացած դեպք, սակայն կոնկրետ այս դեպքի մասով, թե ինչ է եղել հստակ, այս պահին  պարզում է ոստիկանությունը:

Ոստիկանության լրատվական ծառայությունից էլ հայտնեցին, որ տվյալ դեպքով այս պահին կատարվում է նախաքննություն, և այլ մանրամասներ հաղորդել հնարավոր չէ: