Օգոստոսի 31-ի գիշերը Թբիլիսիի մոտակայքում վթարի ենթարկված՝ Երևան-Բաթում ուղևորափոխադրումներ իրականացնող միկրոավտոբուսի ուղևորներից երկուսը շարունակում են մնալ Թբիլիսիի «Նյու Հոսփիթալ» հիվանդանոցում: 

Հիվանդանոցից «Ալիք մեդիային» փոխանցել են, որ հիվանդներից երկուսի վիճակը  բժիշկները շարունակում են գնահատել կայուն ծանր: Նրանց տեղափոխման համար հարազատները համաձայնություն չեն տվել։ Նույն հիվանդանոց տեղափոխված 8 ուղևորներից 5-ն առաջին բուժօգնություն ստանալուց հետո դուրս էին գրվել:

Ավելի վաղ վրաստանյան գործընկերների հետ խորհրդակցության արդյունքում որոշում էր կայացվել վթարից տուժած 4 քաղաքացու Հայաստան տեղափոխել: 

Հայաստանից ռեանիմոբիլներով 3 բժշկական խումբ է ուղարկվել Թբիլիսի: Այս մասին ֆեյսբուքում գրառում էր արել ՀՀ առողջապահության նախարար Արսեն Թորոսյանը: 

Հիշեցնենք, որ օգոստոսի 31-ին՝ ժամը 02։00-03։00-ի սահմաններում, Երևան-Բաթում ուղևորափոխադրումներ իրականացնող միկրոավտոբուսը Թբիլիսի չհասած վթարի էր ենթարկվել: 

Վթարի հետևանքով 2 մարդ էր զոհվել՝ ՀՀ քաղաքացիներ Գ.Ա.-ն և Մ.Ս-ն։ Մնացած ուղևորները տարբեր աստիճանի մարմնական վնասվածքներով տեղափոխվել էին Թբիլիսիի հիվանդանոցներ:

 Տեսանյութը`  «Վրաստանում Հայաստանի դեսպանություն» ֆեյսբուքյան էջից: