Նարեկ Մանուկյանը Ուռուցքաբանության ազգային կենտրոնի ժամանակավոր պաշտոնակատար է նշանակվել
Ֆանարջյանի անվան Ուռուցքաբանության ազգային կենտրոնի տնօրեն Արմեն Տանանյանը ազատվել է զբաղեցրած պաշտոնից:
Այս մասին հայտնում է Sputnik Արմենիա-ն։
«Ուրբաթ օրն ենք իմացել այդ մասին, սակայն պատճառների մասին մեզ ոչինչ չեն ասել։ Հենց հիմա ժողով է մեզ մոտ։ Ասել են` հիմա էլ կներկայացնեն նաև նոր տնօրենին»,–հայտնեցին Ուռուցքաբանության ազգային կենտրոնից։
ՀՀ առողջապահության նախարարի մամուլի խոսնակ Ալինա Նիկողոսյանը մանրամասնել է, որ մի քանի օր է` կենտրոնը պետգույքի կառավարման կոմիտեից անցել է Առողջապահության նախարարության ենթակայության տակ։
«Նախարարությունն իր լիազորությունների սահմաններում կենտրոնում կատարում է փոփոխություններ, այդ թվում` կադրային։ Նախարարի հրամանով` Տանանյանն ազատվել է աշխատանքից, իսկ կենտրոնի տնօրենի ժամանակավոր պաշտոնակատար է նշանակվել ուռուցքաբան Նարեկ Մանուկյանը»,– ասել է նա։
Նշենք, որ Արմեն Տանանյանն Ուռուցքաբանության ազգային կենտրոնի տնօրենի պաշտոնը զբաղեցնում էր 2014 թվականից: Մինչ այդ` 2007թ–ից, նա հիվանդանոցի տնօրենի տեղակալն էր։ Նա եղել է նաև ՀՀ առողջապահության նախարարության գլխավոր ուռուցքաբանը։
Հիշեցնենք, որ պետական առողջապահական գործակալությունը դեռ ապրիլ ամսին էր հայտնել, որ ավարտել է ստուգումները Ուռուցքաբանության ազգային կենտրոնում։ Այնտեղ 43 միլիոն դրամի խախտումներ էին հայտնաբերվել։
