Գաղտնի զեկույցին ծանոթանալու համար Է. Մարուքյանին առաջարկել են այցելել վարչապետի աշխատակազմ

ԱԺ «Լուսավոր Հայաստան» խմբակցության ղեկավար Էդմոն Մարուքյանը հրապարակել է վարչապետ Նիկոլ Փաշինյանին ուղղած նամակի պատասխանը:

Հիշեցնենք, որ  Մարուքյանը խնդրել էր վարչապետին ներկայացնել, թե ինչ գաղտնի փաստաթղթի մասին էր նա խոսել ուղիղ եթերում, երբ ասել էր, որ արձակուրդի ընթացում մի փաստաթղթի էր ծանոթացել, որը ցույց է տալիս, ոչ որ մեր երկրում, ըստ էության, պետական ինստիտուտները կաթվածահար են, և ինստիտուցիոնալ առումով մեր երկիրն ամբողջությամբ ձախողված է: 

«Շատ կարեւոր է այս փաստաթուղթը, գրվել է Սերժ Սարգսյանի իշխանության վերջին տարիներին: Ես կարծում եմ, այս փաստաթղթի հեղինակները իսկապես շատ մեծ համարձակություն են ցուցաբերել»,-ասել է վարչապետը:

 Էդմոն Մարուքյանն իր գրառման մեջ նշել է. «Քիչ առաջ ստացել ենք այս գրությունն ի պատասխան վարչապետին ուղարկված իմ նամակի, որով խնդրել էի վարչապետի կողմից ուղիղ եթերներից մեկում հիշատակված գաղտնի զեկույցին ծանոթանալու հնարավորություն ընձեռել ինձ»: Ըստ գրության՝ Մարուքյանին հորդորում են փաստաթղթին ծանոթանալու համար այցելել վարչապետի աշխատակազմ: