Բախտագուշակը հաճախորդին ասել է՝ 60 հազար դրամ տուր՝ օգնեմ, որ վթարի չենթարկվես
Ոստիկանության Մաշտոցի բաժնի հետաքննչական բաժանմունքում նյութեր են նախապատրաստվում Արարատի մարզում տեղի ունեցած խարդախության փաստով: Ինչպես հայտնում է ֆոտոլրագրող Գագիկ Շամշյանը, երեկ՝ օգոստոսի 27-ին, ոստիկանության Մասիսի բաժին է դիմել Արտաշատ քաղաքի բնակիչ, 48-ամյա Գայանե Հ.-ն և հայտնել, որ ինքը այցելել է Մարմարաշեն գյուղ՝ բախտ նայողի մոտ և նրան վճարել 10 հազար դրամ, ինչից հետո բախտ նայողը նրան հայտնել է, որ պետք է լրացուցիչ տա 60 հազար դրամ, որպեսզի ինքը, որպես բախտագուշակ, օգնի իրեն՝ վթարի չենթարկվի: Գ. Շամշյանի տեղեկություններով՝ Գայանե Հ.-ն ոստիկաններին հայտնել է, որ հիմա ինքը գտնվում է բախտագուշակի տանը ու նրանից գումարը հետ են պահանջում, սակայն նրա աղջիկը ասել է, որ դանակը կմտցնի իր որովայնը:
Դեպքի վայր է մեկնել ոստիկանության Մասիսի բաժնի օպերատիվ խումբը՝ համայնքային ոստիկանության բաժանմունքի տեսուչ Բուքուշյանի գլխավորությամբ, ովքեր պարզել են, որ Մարմարաշեն գյուղի 31-րդ փողոցի բնակիչ, 52-ամյա Լաուրա Մ.-ն իր տանը բախտ նայելու պատրվակով Գայանե Հ.-ի վստահությունը չարաշահելով, նրանից խաբեությամբ հափշտակել է 66 հազար դրամ:
