Ամուլսարը խմբակցության որոշման հարց չէ, կառավարության հարցն է. Ալեն Սիմոնյան
ԱԺ փոխխոսնակ, «Իմ քայլը» խմբակցության անդամ Ալեն Սիմոնյանը խմբակցության այսօրվա նիստից հետո ներկայացրեց, թե որոնք են եղել օրակարգային հարցերը:
Սիմոնյանը նշեց, որ քննարկվող հարցերն են եղել՝ ԲԴԽ անդամների, կանոնադրության փոփոխություն, աշխատանքներ, որոնք սկսվելու են սեպտեմբերի 9-ից՝ ԱԺ նստաշրջանի մեկնարկի հետ, և, ի վերջո, արձակուրդներ են եղել, ընդհանրապես պատգամավորների հետ քննարկումներ են եղել տարբեր հարցերի շուրջ:
Սիմոնյանից հետաքրքրվեցին՝ արդյո՞ք քննարկումների առանցքում եղել է նաև Ամուլսարի հարցը: Նա պատասխանեց.
«Ամուլսարը խմբակցության քննարկելիք հարց չէ, մասնագիտական ոլորտում է: Ամեն մեկդ մի պատգամավորից, մյուսից մի կարծիք եք վերցնում, մյուս քաղաքական գործչի խոսքի հետ համադրում, փորձում լուր ստանալ, դրանից հարցը ո´չ լուծվում է, ո´չ էլ դիրքորոշում է պարզ դառնում: Դա ինտրիգ է՝ լավ վերնագիր դնելու համար: Ամուլսարի հարցը մասնագիտական ոլորտում է, այստեղ զուտ կարող եք նայել քննարկումներ՝ քաղաքական ուժի ներսում ով ինչ կարծիք ունի: Բռնեք Պետրոսին Պողոսին հակադրեք, ասեք՝ ա´յ, տես, սենց բան եղավ: Արե´ք, ձեր իրավունքն է»:
ԱԺ փոխխոսնակը նաև արձագանքեց «Իմ քայլը» խմբակցության անդամ Սոֆյա Հովսեփյանին ուղղված հարցերին՝ խմբակցության դիրքորոշման հետ կապված, նշեց՝ Ամուլսարը խմբակցության որոշման հարց չէ, կառավարության հարցն է, և նրա դիրքորոշումը, եթե եկավ ԱԺ, կքննարկվի:
