Քաղաքացիները փորձել են փակել Բաղրամյան պողոտան. Անի Խաչատրյանը բերման է ենթարկվել
Ի նշան բողոքի` քաղաքացիները քիչ առաջ փակեցին Բաղրամյան պողոտան: Ոստիկանները հորդորում են քաղաքացիներին չխանգարել երթևեկությանը։ Արդյունքում ոստիկանությունը բերման ենթարկեց բնապահպան Անի Խաչատրյանին: Ոստիկանությանը հաջողվեց բացել երթևեկությունը, սակայն այս պահի իրավիճակն այս հատվածում շարունակում է լարված մնալ։ Քաղաքացիների և ոստիկանների միջև հրմշտոց է սկսվել:
Աննա Շահնազարյանը դժգոհ է, որ իրենց թույլ չեն տալիս Ազգային ժողովի այգում հանրային քննարկում անցկացնել Բաղրամյան 26-ում Ամուլսարի հարցով քննարկումից հետո: «Ազգային ժողովի այգին, որը հանրային վայր է, որոշեցինք քննարկում անելու համար օգտագործել, մինչդեռ ոստիկանները թույլ չեն տալիս», - ասաց նա: Բնապահպանն անօրինական համարեց այս քայլը՝ նշելով, որ ոստիկանների պարզաբանումը, թե անվտանգության նկատառումներից ելնելով են փակել այգու դարպասներն, անօրինական են.
«Որևէ օրինական հիմք չկա այստեղ: Հանրային այգին, հանրային է, հիմա այսքան մարդ կարող է այստեղ մտնել, ջուր խմել: Ուրեմն այստեղ կարելի՞ է գորգ լվանալ, բայց մարդկանց թույլ չի՞ տրվում մտնել, քննարկում անել: Հիմա տներից խալի բերենք, լցնենք լվանալու, թույլ կտան: Ռեպրեսիաների շարք է սկսվել, մարդիկ փաստացի հանրային տարածք են ուզում մտնել, բռնություն է գործադրվում», - ասաց նա:
Հիշեցնենք, որ այսօր Բաղրամյան 26-ում վարչապետը քննարկում էր հրավիրել Ամուլսարի հանքի շահագործման հարցով: Քննարկման արդյունքներից դժգոհ բնապահպանները հայտարարեցին ԱԺ այգում հանրային քննարկում կազմակերպելու մասին, մինչդեռ ոստիկանները թույլ չտվեցին մուտք գորել այգի, որից հետո ակտիվիստներն ի նշան բողոքի՝ պառկեցին մայթին:
