Կրեմլում մեկնաբանել են Մերձմոսկովյան շրջանի եգիպտացորենի դաշտում վթարային վայրէջք կատարած ինքնաթիռի հետ կապված միջադեպը և հայտարարել, որ օդաչուներին ամենակարճ ժամկետներում կպարգևատրեն: 

ՌԴ նախագահի մամուլի խոսնակ Դմիտրի Պեսկովը հայտարարել է, որ պետական պարգևները շնորհվում են երկրի ղեկավարի հրամանագրով:

«Երբ հերոսները ներկայացվեն պարգևների, սեղմ ժամկետներում կկատարվեն անհրաժեշտ ընթացակարգերը, դրանում ոչ մի կասկած չկա, և նրանք կպարգևատրվեն»,- հայտնել է Դմիտրի Պեսկովը: Նա ընդգծել է, որ օդաչուներին Կրեմլում հերոս են համարում: Պատահարի բոլոր գործոնները պարզ կդառնան հետաքննությունից հետո, որը խոստանում է օպերատիվ լինել, քանզի ինքնաթիռի «սև արկղերը» պահպանվել են,- ասել է Պեսկովը:

Ավելի վաղ հաղորդվել էր, որ եգիպտացորենի դաշտում, որտեղ այսօր առավոտյան վթարային վայրէջք է կատարել Մոսկվա-Սիմֆերոպոլ չվերթն իրականացնող օդանավը, աճող բերքը նախատեսված է ձմռանն անասուններին կերակրելու համար: Այդ մասին ռուսական РЕН ТВ-ին պատմել է հողատարածքի սեփականատեր Սերգեյ Դոլժիկովը: «Վնասը գնահատելու հնարավորություն դեռ չկա, չեն թողնում դեպքի վայրին մոտենալ, սակայն կարծում եմ, որ լուրջ բան է: Երբ օդանավն այնտեղից տանեն, դաշտը կավերեն ամբողջությամբ: Պետք է մտածել՝ ինչով կերակրել անասուններին ձմռանը»,- ասել է նա: Սակայն ամենագլխավորն, ըստ նրա, այն է, որ այս միջադեպն ավարտվել է առանց զոհերի:

Հիշեցնենք, որ  Ռուսական «Ուրալյան ավիաուղիներ» ավիաընկերության А321 օդանավն այսօր առավոտյան վթարային վայրէջք է կատարել Մերձմոսկովյան շրջանում՝ «Ժուկովսկի» օդանավակայանից օդ բարձրանալուց հետո: Բարձրություն հավաքելու ժամանակ օդանավը բախվել է երամի, ինչի հետևանքով երկու շարժիչներն անջատվել են, քանի որ դրանցում թռչուններ են հայտնվել: Շարժիչներից մեկը սկսել է այրվել:

Օդանավում եղել է 234 մարդ, այդ թվում՝ 7 հոգանոց անձնակազմը: Այս պահին հայտնի է, որ վթարային վայրէջքից տուժել է 74 ուղեւոր: