Փոխհրաձգություն` Տաջիկստանի և Ղրղզստանի սահմանին. զոհ և վիրավորներ կան
Տաջիկստանի և Ղրղզստանի սահմանին իրավիճակը սրվել է, երկուշաբթի երկու երկրների սահմանամերձ հատվածում կրակոցներ են հնչել: Այս մասին հայտնում է РИА Новости-ն:
Նշվում է, որ զոհվել է 1 մարդ, վիրավորվել են 20-ը: Ինչպես հայտնել են Ղրղզստանի պետական սահմանապահ ծառայությունից` Բիշքեկում հայտարարել են, որ պատճառը տաջիկական Վորուխ գյուղում դրոշի ձողի տեղադրումն է: Ղրղզական Աքսայ գյուղի բնակիչները դեմ են արտահայտվել, բանավեճ է սկսվել, ինչից հետո կողմերից մեկը զենք է կիրառել: Դուշանբեում էլ հայտարարել են, որ կոնֆլիկտը սկսվել է տաջիկական Վորուխի տարածքում՝ «Աքսայ» գրությամբ սյան տեղադրման պատճառով:
«Բնակչության հետ հանդիպման ժամանակ, որին մասնակցել են սահմանապահ ծառայության ղեկավարն ու Բատկենի նահանգապետը, տաջիկական կողմից երկու կրակոց է հնչել Ղրղզստանի քաղաքացիների ուղղությամբ»,- ասել են գերատեսչությունում:
Նշենք, որ երկու երկրների միջև կոնֆլիկտի պատճառը չսահմանազատված տեղամասերն են, որտեղ հնարավոր չէ որոշել՝ որտեղ է անցնում երկու պետությունների սահմանագիծը:
