ԱԺ-ում բուռն շինարարություն է. Հրապարակ
«Հրապարակ» թերթը գրում է. «Գործուղումների վրա փող չխնայող, բայց «բոլոր պատգամավորներին միանման սենյակներ» խոստումը չկատարած ԱԺ-ում բուռն շինարարություն է՝ փոխում են ջեռուցման համակարգը։ «31 սենյակում փոխվել է, զուգահեռ` այդ սենյակները վերանորոգվում են, հայտարարվել է լուսամուտների փոփոխման մրցույթ։
Հազիվ էլ մինչև նոր նստաշրջան այդքանը հասցնենք, սակայն շատ ակտիվ միջոցառումներ են տեղի ունենում ԱԺ այգում․ օրերս, «Ոսկե ծիրան» փառատոնի շրջանակներում, ցուցադրվեց «Թեյախմություն Մուսոլինիի հետ» ֆիլմը», - ասաց ԱԺ աշխատակազմի ղեկավար Տիգրան Գալստյանը: Հատո՞ւկ էիք ընտրել այդ ֆիլմը։ «Ոչ, այդպես էր ստացվել։ Հուլիսի 20-ին էլ շախմատի մրցույթ ենք կազմակերպելու՝ պատգամավորները խաղալու են երեխաների հետ»:
Կարծես դա էլ է նշանային․ այս ԱԺ-ի մասին ասում են` «մանկապարտեզ»: «Չէ, այդ օրը Շախմատի միջազգային օրն է»: Սերժ Սարգսյանի՞ն եք քողարկված փիառում։ «Ոչ, չկա նման բան, գալու են նաև հայտնի շախմատիստներ՝ մրցանակներ տան հաղթողներին»»:
