Սամվել Բաբայանին կդատի նոր դատավոր
Լեռնային Ղարաբաղի պաշտպանության նախկին նախարար Սամվել Բաբայանի գործն այս անգամ էլ մակագրվել է Երեւան քաղաքի ընդհանուր իրավասության դատարանի դատավոր Գագիկ Պողոսյանին։ Այս մասին տեղեկանում ենք «Դատալեքս» տեղեկատվական համակարգից։
Հիշեցնենք, որ նախորդ տարվա հունիսի 15-ին Վճռաբեկ դատարանն ազատ էր արձակել առաջին ատյանի կողմից վեց տարվա ազատազրկման դատապարտված Սամվել Բաբայանին: Մեկ տարի երեք ամիս անազատության մեջ գտնվող Լեռնային Ղարաբաղի պաշտպանության նախկին նախարարի խափանման միջոցը փոխվել էր «Ծառուկյան» և «Ելք» խմբակցությունների մեկ տասնյակից ավելի պատգամավորների երաշխավորագրերի հիման վրա: Մինչդեռ պաշտպանական կողմը պահանջում էր արդարացում։
Վճռաբեկ դատարանը միաժամանակ բեկանել էր առաջին ատյանի վճիռն ու գործն ուղարկել վերաքննության:
2017 թ նոյեմբերի 28-ին Արցախի Պաշտպանության բանակի նախկին հրամանատար Սամվել Բաբայանը դատապարտվել էր 6 տարվա ազատազրկման։ Երևանի Կենտրոն և Նորք Մարաշ վարչական շրջանների ընդհանուր իրավասության դատարանի դատավոր Արշակ Վարդանյանը նրան մեղավոր էր ճանաչել առաջադրված 2 մեղադրանքներում՝ «Իգլա» տեսակի զենիթահրթիռային համալիր ձեռք բերելու, ինչպես նաև կեղծ փողերի շրջանառության համար։ Սամվել Բաբայանի մարտական ընկերը՝ Սանասար Գաբրիելյանը, դատապարտվել էր 3 տարվա ազատազրկման, Արմեն Պողոսյանը՝ 2, գործով մյուս ամբաստանյալները՝ Կարեն և Անդրանիկ Քոչարյանները, Դավիթ Հարությունյանը և Ժորա Զաքարյանը՝ 2 տարվա պայմանական ազատազրկման։
Գործը բեկանումից հետո մակագրվել էր Երեւան քաղաքի ընդհանուր իրավասության դատարանի դատավոր Մարինե Մելքոնյանին։ 8 դատական նիստ նշանակելուց հետո, սակայն վերջինս գործուղվել է։
Դատավոր Գագիկ Պողոսյանն էլ արդեն նիստի օր է նշանակել։ Գործով առաջին նիստը տեղի կունենա հուլիսի 19-ին։
