Ամուլսարի պահապանների համար դրամահավաք անցկացրած ակտիվիստին բերման ենթարկելլուց հետո քրգործ է հարուցվել

Նախօրեին ոստիկանություն բերման ենթարկված՝ «Հայկական բնապահպահպանական ճակատի» անդամ, Ամուլսարի պահապանների համար դրամահավաք իրականացնող Աննա Շահնազարյանն ազատ է արձակվել։ Այս մասին նա հայտնել է ֆեյսբուքյան ուղիղ եթերի միջոցով:

«Մենք դրամահավաք էին կազմակերպել, մեզ մոտեցան եւ հարցրեցին, թե ինչ դրամահավաք է, ես բացատրեցի, ներկայացրեցի, հետո իրենք պահանջեցին ինչ-որ փաստաթղթեր, որ քաղաքապետարանը թույլատրել է անցկացնել դրամահավաք, ես ասացի, որ նման փաստաթուղթ չունեմ, եւ պահանջեցի բացատրել, թե ինչու են ինձանից նման փաստաթուղթ պահանջում, այնուհետեւ ինձ նստեցրին մեքենան եւ տեղափոխեցին Ոստիկանության Կենտրոնի բաժին, մոտ 3 ժամ անցկացնելու ընթացքում ես հրաժարվեցի բացատրություն տալ: Հետո ինձ ասացին, որ խարդախության կասկածանք կա, որ ընդհանրապես դրամահավաքությամբ զբաղվելու հետ կապված խնդիրներ կան»,- ասել է նա` հավելելով, որ դրամահավաքն իր ընկերները շարունակել են նաեւ ոստիկանության բաժանմունքի մոտ:

Աննա Շահնազարյանի խոսքով՝ քրեական գործ է հարուցվել խարդախության հոդվածով։ Ոստիկանությունը առգրավել է դրամահավաքի արկղն ու հավաքված 23 հազար դրամը։ Արձանագրության պատճենը նրան չեն տրամադրել։