Ռոբոտատեխնիկական լաբորատորիաներ դպրոցներում` 834 մլն դրամ կհատկացվի
ՀՀ կառավարության այսօրվա նիստում որոշում ընդունվեց 834 միլիոն դրամ հատկացնել դպրոցներում ռոբոտատեխնիկական լաբորատորիաներ ստեղծելու համար։
ՀՀ կրթության, գիտության, մշակույթի եւ սպորտի նախարար Արայիկ Հարությունյանը նշեց, որ որոշումը միտված է կրթության որակի բարձրացմանը։
«Գիտեք, որ Հայաստանի հանրակրթական դպրոցներում այս պահին արդեն գործում են շուրջ 350 նման լաբորատորիաներ, եւ հետազոտություններն էլ ցույց են տալիս, որ ինժեներական մտքի զարգացման համար սրանք լավ ներդրումներ են եւ հետագայում ազդեցություն են ունենալու տնտեսության վրա»,- ասաց Հարությունյանը։
Հայաստանի Հանրապետության կրթության, գիտության, մշակույթի եւ սպորտի նախարարությանը գումար հատկացնելու մասին ՀՀ կառավարության որոշման նախագիծը բխում է Հայաստանի Հանրապետության հանրակրթական դպրոցներում ինժեներական լաբորատորիաների ներդրման անհրաժեշտությունից:
