ԼՈՒՍԱՆԿԱՐ․ Երևանում և մարզերում կենդանիների դաժան սպանդ է կատարվում

Վերջին օրերին կենդանասերներն ու թափառող կենդանիների հարցերով զբաղվող հասարակական կազմակերպությունները սոցիալական ցանցերում ահազանգում են՝ Երևանում և մարզերում կենդանիների սպանդ է կատարվում հրազենի միջոցով։ Վերջին երկու դեպքերն արձանագրվել են Արագածոտնի մարզի Աշտարակի քաղաքում (այստեղ կրակել են կենդանու երեք ոտքերին, կենդանասերների օգնությամբ նրան հաջողվել է փրկել) և Երևանում՝ Հարավարևմտյան թաղամասում (Անդրանիկի փողոց 122շ.)։ Այս դեպքի հետևանքով կենդանին սպանվել է։ Ինչպես հայտնում է Aysor. am-ը՝ իրենց զանգահարած քաղաքացին՝ Արմինե Ղազարյանը, հայտնել է, որ ինքն ու տարածքի մի շարք այլ բնակիչներ խնամում էին այդ շանը, պարբերաբար կերակրում ու վերջինս որևէ վտանգ չէր ներկայացնում շրջակայքի համար, քանի որ գտնվում էր փակ, մասնավոր տարածքում։ Իրավիճակի վերաբերյալ մեկնաբանություն ստանալու համար Aysor. am-ը դիմել է Երևանի քաղաքապետարան, որտեղից նշել են, որ այս ու կենդանիների սպանդի մյուս դեպքերի հետ Երևանի քաղաքապետարանը որևէ կապ չունի ու չի կարող ունենալ։