ՌԴ-ում բանտարկված հայ վիրաբույժի խափանման միջոցը փոխվել է
Շնորհիվ Ռուսաստանում Հայաստանի դեսպան Վարդան Տողանյանի ակտիվ ջանքերի՝ հաջողվել է փոխարինել երիտասարդ պլաստիկ վիրաբույժ Գևորգ Ստեփանյանի խափանման միջոցը, որը մի քանի ամիս է՝ գտնվում է Մոսկվայի Բուտիրյան բանտում: Այդ մասին Facebook-ի իր էջում գրել է Հայաստանի ԱԺ փոխխոսնակ Ալեն Սիմոնյանը:
ՙՄեծ ուրախությամբ ձեզ հետ լավ լուրով եմ ուզում կիսվել․ ՌԴ-ում ՀՀ դեսպան Վարդան Տողանյանի և մեր դեսպանատան ջանքերի շնորհիվ, ՀՀ առողջապահության նախարար Arsen Torosyan-ի հետ քիչ առաջ մեզ հաջողվեց հասնել մեր հայրենակից բժիշկ Գեվորգ Ստեփանյանի խափանման միջոցի փոխարիման (ստորագրությամբ չհեռանալու միջոցով):
Շնորհակալ եմ բոլոր այն մարդկանց, որոնք սատարեցին մեր հայրենակցին՚,- գրել է նա:
Ավելի վաղ ԶԼՄ-ները հաղորդել էին, որ նոյեմբերին Մոսկվայի «Սֆերա» կլինիկայում Կարոլինա Սարգսյանին քթի պլաստիկ վիրահատություն էին կատարել, ինչից հետո նա հայտնվել էր կոմայում գանգի ոսկրի կոտրվածքի պատճառով: Վիրահատության ժամանակ հիվանդն ուժեղ արյունահոսություն էր ունեցել, իսկ բուժհաստատության աշխատակիցները, չկարողանալով դադարեցնել այն, կանչել էին «Շտապ օգնություն», կինը տեղափոխվել էր հիվանդանոց, որտեղ ներդրվել էր բժշկական քնի վիճակում:
Այդ գործով մեղադրվում է նաեւ «Սֆերա» պլաստիկ վիրաբուժության կլինիկայի տնօրեն Գուլնարա Շախն ու անեսթեզիոլոգ Լեվ Խիտրինը, որոնք գտնվում են տնային կալանքի տակ:
