ՏԵՍԱՆՅՈՒԹ․ Կա՛մ մանդատները վայր դրեք, հեղափոխություն արեք, կա՛մ աշխատեք․ Փաշինյանը՝ ընդդիմությանը

ՀՀ վարչապետ Նիկոլ Փաշինյանը Ազգային ժողովում անդրադարձել է ընդդիմության կողմից իշխանության լեգիտիմությունը կասկածի տակ դնող հայտարարություններին՝ առաջարկելով մանդատները վայր դնել և գնալ հեղափոխության, եթե համոզված են, որ ընտրությունները լեգիտիմ չեն եղել։

«Ասել եմ դեռ նախորդ գումարման խորհրդարանի վերջում՝ վայր դրեք ձեր մանդատները, հրապարակը սպասում է ձեզ։ Հեղափոխություն արեք։ Ավելի լավ հեղափոխական իրավիճակ, քան ոչ լեգիտիմ ընտրությունն ու ոչ լեգիտիմ իշխանությունը, չկա։ Դա դրախտ է ցանկացած ընդդիմության համար»,- հայտարարել է Փաշինյանը։

Վարչապետի խոսքով՝ եթե ընդդիմությունը պնդում է, որ ընտրությունները կեղծվել են, պետք է ցույց տա՝ ում ձայներն են կեղծվել, և համապատասխան քաղաքական քայլեր ձեռնարկի։

Փաշինյանը նաև քննադատել է ընդդիմադիր պատգամավորների՝ նիստերի դահլիճից պարբերաբար դուրս գալն ու վերադառնալը։

«Այս մարդիկ լեգիտիմության խնդիր իրենք ունեն։ Իրենք այս դահլիճում տիրոջ կարգավիճակ չունեն, հասկանում են, որ տնվոր են՝ գործուղված ինչ-որ մի միսիայի համար։ Իրադարձություններն արագ են զարգանում, չի գալիս հանձնարարականը՝ ինչ անել, չեն կողմնորոշվում՝ գնում են, գալիս են»,- ասել է նա։

Փաշինյանի խոսքով՝ ստեղծված իրավիճակն արդեն ոչ միայն ընդդիմության, այլև Հայաստանի Հանրապետության խնդիրն է։

«Կամ մանդատները վայր դրեք և զբաղվեք հեղափոխությամբ, կամ եկել եք՝ նստեք, աշխատեք։ Ամեն բառի վրա նեղանալ-գնալը չեմ կարծում, թե ուժեղության նշան է»,- եզրափակել է վարչապետը։