Երևանից մինչև Իրանի սահման ծրագիր ունենք, որ ժամանակակից ճանապարհային նշաններով ենք համալրում, շուրջ չորս հազար նշան պետք է տեղադրվեր, և արդեն մոտենում ենք այդ ծրագրի ավարտին: Այս մասին այսօր կառավարության նիստին ասաց տրանսպորտի, կապի և ՏՏ նախարար Հակոբ Արշակյանը՝ նշելով, որ այդ նշանները գողանում են: «Որ հիմա թվարկեմ՝ ինչի համար են ծառայում, մի քիչ ծիծաղելի կլինի, ասենք՝ թոնրի կափարիչից մինչև ձնամաքրման բահ են օգտագործում,- ասաց Արշակյանը՝ ավելացնելով,- շատ կարևոր է, որ մենք պետական միջոցներ ենք ծախսում դրանք համալրելու համար և ապահովում ճանապարհների անվտանգությունը, կարծում եմ, որ շատ անպատասխանատու է նման մոտեցում ցուցաբերելը, վնաս են տալիս պետությանը և իրենց երեխաների անվտանգությանը»: Նիկոլ Փաշինյանը հետաքրքրվեց, թե որքա՞ն գումար է ծախսվում ծրագրի վրա, նախարարը արձագանքեց՝ մոտ 1 մլն ԱՄՆ դոլար, որին հետևեց վարչապետի հորդորը: