Ադրբեջանը ամերիկյան տեխնիկա է գնում, հետո ռազմականացնում. Սուրեն Սարգսյան

Ադրբեջանը Միացյալ Նահանգների հետ շատ ակտիվ առևտուր է անում: Այս մասին միջազգայնագետ Սուրեն Սարգսյանը խոսել է Tert. am-ի թղթակցի հետ զրույցում: Խոսքը, մասնավորապես, Ադրբեջանի՝ Միացյալ Նահանգներից նախորդ տարի ներմուծած օդանավերի և սատելիտների մասին: «Բավական երկար ժամանակ է՝ ես ասում էի, որ Ադրբեջանը ձեռք է բերել Միացյալ Նահանգների կողմից արտադրված Բելլ-412 ուղղաթիռներ, ձեռք է բերել 3-րդ երկրից, և չնայած դրանք ոչ թե ռազմական էին, այլ քաղաքացիական բնույթի, բայց հետագայում պարզ դարձավ, որ նրանք այդ ուղղաթիռները ձևափոխել և ռազմականացրել են, և այս պահին այդ ուղղաթիռները գտնվում են ոչ թե նրանց քաղավիացիայի կամ Արտակարգ իրավիճակների նախարարության, այլ Պաշտպանության նախարարության բալանսում, ավելին՝ հատուկ նշանակության ջոկատի կայանատեղիում են տեղակայված և գործելու են հատուկ նշանակության ջոկատների ենթակայության ներքո»,- ասաց նա: Նշենք, որ Սուրեն Սարգսյանը երեկ գրառում էր կատարել ֆեյսբուքյան իր էջում՝ տեղեկացնելով, որ Ադրբեջանը նախորդ տարվա նոյեմբերին ԱՄՆ-ից ներմուծել է 197 մլն դոլարի «օդանավեր ու սատելիտներ» կատեգորիայի ապրանքատեսակներ: Նույնն էլ արել էր նաև հոկտեմբեր ամսին: Սուրեն Սարգսյանը նկատեց, որ ստացվում է՝ Ադրբեջանը ձեռք է բերում ամերիկյան ոչ ռազմական տեխնիկա, նաև երրորդ երկրներից, հետո ռազմականացնում:«Ադրբեջանը երրորդ երկրից ձեռք է բերել ԱՄՆ կողմից արտադրված Բելլ քաղաքացիական ինքնաթիռները: Հետո, իհարկե, պարզ դարձավ, որ դրանք ռազմականացվել են և այժմ գտնվում են երկրի ՊՆ բալանսում, ավելին, դրանք հատուկ նշանակության ջոկատի ենթակայության տակ են գործելուՙ բնականաբարՙ օգտագործվելով Արցախի և Հայաստանի դեմ»: