ՏԵՍԱՆՅՈՒԹ․ Կառավարությունը հաստատեց առաջիկա 5 տարվա ծրագիրը
Կառավարության արտահերթ նիստում հաստատվեց կառավարության նոր ծրագիրը, որը կներկայացվի Ազգային ժողով։ ՀՀ վարչապետ Նիկոլ Փաշինյանը հայտարարեց, որ այս ծրագրով իրենք ազդարարում են տնտեսական հեղափոխության մեկնարկը։
Նա ընդգծեց, որ դեռևս երկու օր առաջ ծրագիրը հրապարակվել է և եղել են որոշակի արձագանքներ. «Մենք նաև կառավարությունում այդ արձագանքների քննարկում նախաձեռնեցինք աշխատաքային կարգով և այդ քննարկումը մեզ օգնեց ևս մեկ անգամ արձանագրել, ու այս ծրագիրը լիարժեք համապատասխանում է մեր ունեցած հայեցակարգային պատկերացումներին: Իհարկե, ԱԺ-ում ես այդ մասին առավել մանրամասն կխոսեմ: Բայց մեր հայեցակարգային մոտեցման համար անկյունաքարային նշանակություն ունի հետևյալը, որ մենք հռչակել ենք տնտեսական հեղափոխության հայեցակարգը, և այս ծրագրով ազդարարում ենք տնտեսական հեղափոխության մեկնարկը՝ արձանագրելով, որ կառավարության գործառույթը շարունակում է մնալ այնպիսին, ինչպիսին եղել է ՀՀ-ում թավշյա հեղափոխության քաղաքական հարթակի պատասխանատվությունը: Եվ դա հնարավորություններ ստեղծելն է»:
Հիշեցնենք, որ ըստ Սահմանադրության` այսօր կառավարության ծրագիրը ներկայացնելու վերջնաժամկետն է, եւ այն պետք է արդեն ուղարկվի խորհրդարան, որից 24 ժամ հետո ԱԺ նախագահ Արարատ Միրզոյանը կհայտարարի առաջին նստաշրջանի շարունակման օրը` քննարկման առարկա դարձնելով այդ փաստաթուղթը։
Թեեւ փետրվարի 6-ին կառավարության ծրագրի նախագիծը հրապարակվել էր, սակայն կառավարության նախորդ նիստում վարչապետ Նիկոլ Փաշինյանն առաջարկել էր մինչեւ վերջին օրը սպասել, շանսը օգտագործել եւ խմբագրական աշխատանքներ կատարել։
