ՊԵԿ պարգևավճարներից ևս խոսել են այսօրվա դռնփակ նիստում. ի՞նչ է սպասվում

«Միայն Պետեկամուտների կոմիտեի հետ չէ, որ լինելու է հանդիպում: Եթե մենք ուզում ենք որոշումներով ու լուծումներով հանդես գալ, իսկ մենք ուզում ենք դա, ապա չենք կարող միայն մի գերատեսչության ղեկավարի հետ հանդիպման արդյունքում ներկայացնել լուծում կամ առաջարկ: Խնդիրը համապարփակ կուսումնասիրենք: Այս պահին լուծում չկա: Եվս մի գերատեսչություն կուսումնասիրենք, կհասկանանք, թե ինչպիսի օրենսդրական նախաձեռնությունների կարիք կա, դրա կարիքը կա՞, թե՞ ոչ: Իսկ ՊԵԿ պարգևավճարների ընդհանուր բյուջեն ուղիղ կեսով՝ 50 տոկոսով, կրճատվել է 2019 թվականի համար: Այս խմորումներն արդեն իսկ արձագանք ստացել են և լուծումներ ստանում են»,- խոսելով այսօր կայացած «Իմ քայլը» խմբակցության պատգամավորների, կառավարության անդամների ու մարզպետների հետ դռնփակ հանդիպման մասին, ասել է ԱԺ «Իմ քայլը» խմբակցության ղեկավար Լիլիթ Մակունցը: Նա նշել է նաև, որ ավելի քան 4 ժամ տևած քննարկումների ժամանակ խոսել են վարչապետի վերջին այցելություններից՝ Դավոս և Գերմանիա, պարգևավճարներից, եղել են նաև առանձին թեմաներ: Հպանցիկ քննարկել են նաև կառավարության կազմը, որևէ խորքային քննարկում չի եղել, քանի որ «այն դեռևս կառավարության քննարկման առարկա է»: