Տաքսիստները մոլորեցնում և խաբում են զբոսաշրջիկներին
Գաղտնիք չէ, որ հայ տաքսիստները մեր երկիր ժամանած օտարերկրացիներին, որոնք անծանոթ են տեղանքին հաճախ, մեղմ ասած խաբում են:
Երբեմն կարճ ճանապարհով տանելու փոխարեն նախընտրում են երկարը՝ ավելի շատ գումար գանձելու նպատակով, երբեմն էլ ուղղակի երևակայությունն են գործի դնում:
Եվ այսպես, Ավրորայի լրատվական բաժին բազմաթիվ ահազանգեր են եղել այն մասին, որ Զվարթնոց օդանավակայանում անհատ տաքսու վարորդները զբոսաշրջիկներից անբարեղճորեն 30-60 հազար դրամ են վերցրել քաղաքի կենտրոն տանելու համար ու նշել, թե այդ գումարի մեջ նաև Հայաստան մտնելու տուրքի վճարն է:
Պարզվում է, որ որոշ, այսպես ասած, հնարամիտ ու ճարպիկ վարորդներ օդանավակայանի արգելափակոցն անցնելու ժամանակ զբոսաշրջիկներին ասում են, որ սա Հայաստանի սահմանն է և 30 հազար դրամ են վերցնում՝ իբրև Հայաստան մուտք գործելու վճար:
Հատկանշական է, որ Հայաստան այցելած զբոսաշրջիկներից շատերը տարբեր սոցցանցերում և տուրիստական ֆորումներում բավականին բացասական գրառումներ են կատարում և բողոքում անհատ տաքսու վարորդներից:
Փոխարենը մենք ամեն ինչ անենք, որ յուրաքանչյուր ժամանող եւս մեկ անգամ այցելելու ցանկություն ունենա եւ դառնա մեր երկիրը գովազդող, մեր զբոսաշրջության աճին նպաստող յուրօրինակ գործակալ, մեզ մոտ հակառակ պրոցեսն է տեղի ունենում: Ուստի, AuroraNews-ը կոչ է անում Գլխավոր դատախազությանը ուսումնասիրել այս դեպքերը և պատասխանատվության ենթարկել խարդախներին՝ ապագայում թույլ չտալու նմանատիպ անբարեխիղճ և հնարամիտ վարորդներին վարկաբեկել մեր երկիրը:
