ՊՆ-ից հորդորում են՝ զգուշացեք «բանակի համար» գումար հավաքողներից
Վերջին շրջանում տարբեր կազմակերպություններ կազմակերպում են դրամահավաքներ, կամ առաջարկում օգտվել իրենց ծառայություններից, վստահեցնելով,որ իրենց ստացած հասույթի մի մասը հատկացվելու է բանակին։
Օրեր առաջ Ավրորա Մեդիան ևս ստացավ նման նախաձեռնության մասնակցելու առաջարկ։ Ծրագրով առաջարկվում էր՝ Թալիշի առանջագիծը հսկող զինվորների ծառայությունը հարմարավետ դարձնելու համար կազմակերպել դրամահավաք-հանգանակություն։
Հանգանակությամբ նախատեսվում էր գնել ջրատար ուսապարկ՝ դաշտային թվային քողարկմամբ։ Տեղեկությունը՝ banak info կայքից է։
Գնալով առաջարկության հետքերով՝ Ավրորա Մեդիան Պաշտպանության նախարարության իր աղբյուրից ճշտեց, որ նախարարությունը երբեք նման նախաձեռնությամբ հանդես չի եկել։ Ավելին՝ Պաշտպանության նախարարությունից մեզ, ինչպես նաև հանրությանը հորդորեցին զգույշ լինել նման նախաձեռնություններից և դրամահավաքներից։
Հիշեցնենք, որ օրերս Tert am լրատվական կայքն էլ անդրադարձել էր «Զին տաքսի» ընկերության գործունեությանը։ Վերոնշյալ ընկերությունը նշում է, թե իր եկամուտի մեծ մասն ուղղում է բանակին։ Լրատվամիջոցը պարզել էր, որ ՊԵԿ-ը ստուգումներ չի արել նշված կազմակերպությունում, իսկ «Զին տաքսի»-ի ընկերության սեփականատերերը չեն պատասխանում հարցերին, թե ի՞նչ ճանապարհով են իրենց եկամտի 80%-ն ուղղում բանակին։
