Նախագահ Արմեն Սարգսյանը հուզվել է զինծառայողներին և ծնողներին պարգևատրելիս
Հայաստանում այսօր տոնում են Բանակի օրը։ Հայաստանի նախագահ Արմեն Սարգսյանը պարգևատրեց 33 զինծառայողի, բայց նրանցից երեքի փոխարեն մեդալներ ստացան նրանց ծնողները, գրում է Sputnik Armenia-ն։
«Արամ Ճաղարյանի մայրը արցունքն աչքերին ընդունեց մեդալը. հուզմունքը զսպում էր։ «Մենք շնորհակալ ենք ձեզ», – ցածրաձայն ասաց նախագահը, և երկուսի դեմքն էլ այլայլվեց։ Երկուսն էլ քիչ էր մնում հեկեկային բեմի վրա. իրավիճակը փրկեցին ծափահարությունները։ Կինը շրջվեց, որպեսզի հեռանա, բայց նախագահը չթողեց։ Նա նրբորեն գրկեց հերոսի մորը` լուսանկարվելու համար»,- գրում է լրատվամիջոցը։
Հայկ Քարամյանի հորը մեդալը հանձնելու համար էլ նախագահն իջավ բեմից և օգնեց նրան բարձրանալ աստիճաններով։ Հուզմունքից և հպարտությունից դողալով` ալեհեր տղամարդը մեղմ ժպտաց։ Նախագահը գրկեց նրան։
Մհեր Հովսեփյանի մայրը բեմ բարձրացավ արդեն արցունքոտ աչքերով։ Դառնորեն նայեց պատվո պահակախմբի զինվորին, կամացուկ ինչ–որ բան ասաց։ Հնարավոր է` շնորհավորանք էր։ Ամեն դեպքում զինվորը նկատելի ժպտաց։ Նախագահը նրան էլ ուղեկցեց։
Ավելի ուշ Արմեն Սարգսյանն ասաց Sputnik Արմենիայի թղթակցին, որ նրանց հետ խոսել է որպես մարդ, որը ցավ է ապրում նրանց կորուստի համար։
«Ու ես հիշեցի, թե ինչպես միջոցառումից առաջ, երբ դահլիճ մտավ զինծառայողների խումբ, տղաները միմյանց հարցնում էին` «որտեղ են մեր դիրքերը»։
Պարզ էր, որ այդ տղաները դիրքեր զիջել չգիտեն»- գրում է լրատվամիջոցը։
